Европоһоо- шангай һууринуудтай

Европын чемпионат Словени гүрэнэй Ласко хотодо эмхидхэгдэжэ, 30 гүрэнэй 299 хабаадагшадые суглуулаа. 21 наһа хүрөөдүй тамиршадай дунда Буряадаймнай Сергей Цыренов командна тоосоондо шалгаржа, чемпионой нэрэ зэргэдэ хүртөө. Үбэр Байгалай хизаарай Баир Торгубаев, Москвагай Мухибилло Махмудов гэгшэдтэй Сергей харбажа, Польшо, Украина болон Турци гүрэнүүдэй түлөөлэгшэдые шүүжэ гараа. Хажуугаарнь Баир Торгубаев уласхоорондын спортын мастерай нэрэ зэргэдэ хүртэхэ болоо. Захааминһаа уг гарбалтай, үнинэй Ямало-Ненецкэ автономито тойрогой һуршадые ударидадаг Виктория Бальжанова командна тоосоондо түрүүлһэн байна. Манай мэдээжэ тамиршан, Олимпиин наадануудта мүнгэн медальда хүртэһэн Инна Степанова энэшье удаа Европын чемпионадта шангай һуури эзэлээ. Командна тоосоондо Үбэр Байгалай хизаарай залуу харбагшад Валерия Мыльникова болон Туяна Будажапова гэгшэдтэй хамта Итали, Франци гүрэнүүдэй тамиршадые шүүжэ, хүрэл медаляар шагнагдаа. Хубиин тоосоондо шангай һуурида ганса Эрдэм Цыдыпов хүртөө. Буряадай гүрэнэй хүдөө ажахын академиин оюутан Франциин хоёр түлөөлэгшые урдаа оруулжа, 3-дахи һуури эзэлһэн байна. Европын чемпионадай бүридэлдэ анха түрүүшынхиеэ “баребоу” гэһэн номо һуршаар харбалга оруулагдаа. Энэ хадаа шагаалгын шугамгүй, харбахада хүдэлхэгүйн түлөө элдэб түхеэрэлгэнүүдгүй номо һуршаар болоно гээшэ. Буряадайнгай “Сурхарбаан” нааданда түрүүлһэн Олег Цыбикжапов, мэдээжэ тамиршан Валентин Дарханов гэгшэд бэеэ туршаа. Командна тоосоондо тэдэ 4-дэхи һуури эзэлжэ шадаа. Эдэ үдэрнүүдтэ Дубай хотодо эрэмдэг бэетэй тамиршадай дунда дэлхэйн чемпионат үнгэргэгдэжэ байнхай. Ородой суглуулагдамал командын бүридэлдэ Буряадаймнай тамиршад оруулагдаа. Эдэ хэд бэ гэбэл, Баир Шигаев, Татьяна Андриевская, Александр Гомбожапов гэгшэд болоно