Үндэр амжалта

Буряад ороноо ори гансаараа тэндэ түлөөлһэн Екатерина Карнакова 16-17 наһанай тамиршадай дунда шалгараа. 60 килограмм хүрэтэр шэгнүүртэ ринг дээрэ табан хүн гараһан байна. Хахад финалай уулзалгада Екатерина Турци гүрэнэй Субенир Су гэгшые шүүжэ гараа. Буряадай тамиршан финалда Бельги гүрэнэй Сара Пиккириллатай уулзажа, мүнгэн медаляар шагнагдаха болоо. Буряад Уласай Тайска боксын федерациин хүтэлбэрилэгшэ, дэлхэйн абарга Жаргал Очировай хэлэһээр, һоригшо Владимир Ломакинай шаби үндэр амжалта туйлаба гээшэ. Энээнииень жэшээ болгон, Буряадаймнай тамиршад нютагтаа үнгэрхэ Ородой чемпионадта шалгарха бэзэ гэжэ найдагдана. Тус тэмсээн Улаан-Үдэдэ март һарада болохоор хараалагданхай