Эрхимүүдэй тоодо

“Кубок Странджа” гэһэн уласхоорондын мүрысөөн аяар 73-дахияа үнгэргэгдэнэ. Эгээл хүндэтэй хэмжээ ябуулгануудай нэгэн гэхэдэ, алдуу болохогүй. Тиимэһээ гүрэн бүхэн тиишэнь эрхимүүдэй эрхимүүдые эльгээдэг заншалтай. Газаа орёо байдалай тогтоод байбашье, тус мүрысөөндэ 36 гүрэн өөһэдынгөө түлөөлэгшэдые эльгээгээ. Бүхы дээрээ ринг дээрэ 206 эрэшүүл, 139 эхэнэрнүүд гараа. Сэлэнгын аймагһаа уг гарбалтай Дулма Лумбунова 81 килограммһаа үлүү шэгнүүртэ чемпионой нэрэ зэргэдэ хүртэбэ. Буряадай тамиршан Кристина Ткачёва болон Казахстанай түлөөлэгшэ Ляззат Кунгейбаева гэгшэдые илажа гараад, алтан медаль абаба. Гусиное озеро тосхоной Наталья Шадрина хоёрдохи жэлээ Серби гүрэнэй түлөө амжалтатай шаасалдана. Энэшье удаа тэрэ дүрбэн уулзалгада илалта туйлаа. Теэд финалда Олимпиин абарга Келли Харрингтондо шүүгдэжэ, 2-дохи һуури эзэлхэ баатай болоо. Шангай 3-дахи һууринуудта Кристина Ткачёва, Людмила Воронцова болон Тамир Галанов гэгшэд гараа. Энэ мүрысөөнэй удаа дэлхэйн болон Европын чемпионадуудта хабаадаха түлөөлэгшэд элирүүлэгдээ.