Барилдаанай һонинууд

Стамбул (Турци).

Түрэл нютагаа холо ойгуур суурхуулһан Яшар Догу барилдаашанай дурасхаалай мүрысөөндэ нэрэ солотой тамиршад олоор хабаадаа. Тэдэнэй дунда Буряадаймнай тамиршад гурбан медаль абаһаниинь һайшаалтай. 59 килограммай шэгнүүртэ Жаргалма Цыремпилова-Цыренова шалгараа. Ород, Казахстан, Польшо гүрэнүүдэй тамиршадые илажа, финалда орожо шадаа. Молдова гүрэнэй Александра Ничита гээшэдэ шүүгдэжэ, мүнгэн медаляар шагнагдаа. Буряад орониие түлөөлдэг чуваш угтай Вероника Чумикова 57 килограммай шэгнүүртэ хүрэл медаль абаһан байна. Кыргызстанай түлөө үнинэй барилдажа байһан Буряадай тамиршан Арсалан Будажапов һайн барилдаа харуулжа, шангай 3-дахи һуури эзэлбэ. Үшөө нэгэ тамиршан Ульяна Тукуреновагай 5-дахи һуурииень амжалта гэжэ нэрлэмээр. Монгол ороной барилдаашад тус мүрысөөндэ хабаадаа. Тэдэ зургаан медальтай гэртээ бусахань. Бат-Очир Болортуяа, Церенчимэд Сухее хоёр чемпионууд боложо тодороо.

 Владимир.

 21 наһа хүрөөдүй шэхэ хатуутай барилдаашадай дунда Ородой чемпионадта Буряадай хоёр түлөөлэгшэд амжалта туйлаа. Иван Максимов түрүүлжэ гараа. Георгий Гончаров 3-дахи һуури эзэлбэ. Май һарада үнгэргэгдэхэ Сурдлимпиин наадануудта Буряадай хоёр тамиршад хабаадаха гэжэ мэдэгдээ. Эдэ хэд бэ гэбэл, Даба Цырендоржиев, Александр Цоктоев гэгшэд болоно.

Якутск.

Ехэшүүлэй дунда Алас Дурна зүгэй чемпионадта шалгарһан тамиршад Ородой чемпионадта хабаадаха эрхэдэ хүртэдэг. Тус мүрысөөнэй удаа Буряадай барилдаашад 9 медальда хүртөө. Жаргал Дамдинов, Алексей Боровицкий болон Андрей Елбаскин гэгшэд түрүү һууринуудта гараа. Хибэсэй эзэд олоор хабаадажа, 25 медаль абаа. Хажуугаарнь эхэнэрнүүдэй тулалдаанууд болоо. Буряадай басагад тэндэ хабаадаагүй.

Улаан-Үдэ.

 Залуушуулай дунда наһанай хоёр бүлэгтэ Алас Дурна зүгэй мүрысөөнүүд Буряадай ниислэлдэ үнгэргэгдэбэ. 21 наһа хүрөөдүй эрэшүүлэй дунда түрүүшүүл 10 шэгнүүртэ элирүүлэгдээ. Эндэ Буряадай тамиршад 7 алтан медаль абаа. Мүн басагадай дунда хибэсэй эзэд таба дахин түрүүлжэ гараһан байна. Үсэгэлдэр 18 наһа хүрөөдүй тамиршад барилдаагаа түгэсхөө.