Буряадаймнай тамиршан алтан медаль шүүбэ

19-25 наһатай оюутан болон аспирантнуудай дунда бүхэроссиин мүрысөөндэ Буряадаймнай боксёрнууд шалгаржа, нэгэ алтан, нэгэ мүнгэн, хоёр хүрэл медальнуудые абаба. Мухар-Шэбэрэй аймагһаа гарбалтай Сандан Санданов (зураг дээрэ) мүнөө үедэ Москвада физкультурын дээдэ һургуулида һурадаг. “Номто” гэһэн спортын клубай гэшүүн Красноярск ерэжэ, алтан медальда хүртөө. Москва болон Благовещенск хотонуудта 15-16 наһанай хүбүүдэй дунда мүрысөөнүүд болоо. Түнхэнһөө гарбалтай, мүнөө Ородой ниислэлдэ олимпиин халаанай училищида һурадаг Амгалан Ангаров Москва хотын чемпион гэжэ тодороо. Алас Дурна зүгэй федеральна тойрогой мүрысөөндэ Буряадай юһэн тамиршад медаль абажа шадаа. Мэргэн Бадмаев болон Артём Саргаев гэгшэд түрүүлжэ гараһан байна.

 Манай багашуул энэ жэл яһала һайн дүн харуулба гээшэ. Нёдондо ургажа ябаа залуу халаан наһанай хэдэн бүлэгтэ чемпионууд болоогүй һэн. Алас Дурна зүгтэ 17-18, 19-22 наһанай бүлэгүүдтэ шанга тулалдаанууд иигэһээр үнгэргэгдэхэ. Тэндэ манайхин түрүүшүүлэй тоодо оролсохо бэзэ гээд найдагдана, - гэжэ Буряадай Боксын федерациин хүтэлбэрилэгшэ, Арадай Хуралай һунгамал Валерий Доржиев хэлэнэ