Тайска боксоор Ород Уласай чемпионат мүнөөдэр эхилхэ

Тус хэмжээ ябуулга ФСК-гай талмай дээрэ эмхидхэгдэхэ. Совет гүрэнэй һандаран үгы болоходо, спортдо дуратайшуул зүүн зүгэй тулалдаанай зүйлнүүдээр бэеэ һорижо эхилээ. Эгээл тэрэ үедэ тайска бокс Буряадаймнай дэбисхэр дээрэ хүгжөө.

• Даша Санжижапов манай Буряадта түрүүшын һоригшо байгаа. Баир Дымбрылов дэлхэйн чемпионадта мүнгэн медаль абажа, нютагаа суурхуулаа. Валерий Санжижапов, Батор Цыбикмитов, Александр Банзаракцаев гэгшэд Ородой болон СНГ-гэй гүрэнүүдэй мүрысөөнүүдтэ шалгараа. Бишье дэлхэйн абарга боложо шадааб, - гэжэ Буряадай Тайска боксын федерациин хүтэлбэрилэгшэ Жаргал Очиров хөөрэнэ.

Оройдоол 2011 онһоо хойшо Улаан-Үдэдэ тайска бокс шэнээр һэргээгдэжэ эхилһэн юм. Һүүлэй байдалаар спортын 14 клубта 500 гаран тамиршад бэеэ һорино. Уласхоорондын болон бүхэроссиин ринг дээрэ яһала һайн дүнгүүдые тэдэ харуулжа эхилээ. 26 можо нютагай 200 гаран тамиршан Буряадай ниислэлдэ болохо тулалдаануудта хабаадаха. Буряадай спортдо дуратайшуул дэлхэйн, Европын, Ородой олон абаргануудые эдэ үдэрнүүдтэ хараха аргатай.