Үбэлэй хаһа, баяртай!

Санаар урилдаан

Үбэлэй халаанай эхиндэ Алиса Жамбалова спортдо дуратайшуулай дунда ехэ найдал түрүүлһэн байна. Теэд дэлхэйн Кубогта хүртэхын түлөө мүрысөөнүүдэй дүнгөөр  Олимпиин наадануудта хабаадаха эрхэдэ хүртэжэ шадаагүй. Гүрэн дотороо эмхидхэгдэһэн урилдаануудта гүйхэ баатай болоо.

Үбэлэй хаһа хэды түгэсэжэ байбашье, Ородой чемпионат гол мүрысөөн боложо үгэнэ. Юуб гэхэдэ, эндэ шалгарһан тамиршад ерэхэ жэлдэ  Ородой суглуулагдамал командын бүридэлдэ оруулагдаха юм. Шэнэ халаанда тэдэ май һараһаа бэлдэжэ эхилхэ гээшэ.

Сыктывкарда Алиса Жамбалова эрхим 10-ай тоодо оролсоһон байна. Классическа түхэлөөр 10 модоной зайн урилдаанда ганса мэдээжэ Наталья Непряевада хүсэгдөөд, мүнгэн медаляар шагнагдаа. 15 километрэй  скиатлондо Алиса 8-дахи дүн харуулаа. Микст эстафетын урилдаанда 9-дэхи һуурида гараа. Мүн эгээл ута 30 модоной  зайда 7-дохи һуури эзэлээ.

Олимпиин наадануудта дүрбэ дахин шангай һуури эзэлһэн Наталья Непряева Сыктывкарта табан алтан, нэгэ хүрэл медаль абаа гээд хэлэлтэй.

Бүхы үбэлэй халаанай, илангаяа тус чемпионадай дүнгүүд апрель һарын һүүл багаар согсологдохо. Эгээл тэрэ суглаанда суглуулагдамал командын бүридэлдэ шэнээр ороһон гэшүүд нэрлэгдэхэ. 

 

Биатлон

Буряад Уласай Кабанскын аймагай Селенгинск тосхонһоо уг гарбалтай Елизавета Каплина халаанай эхиндэ Ородой суглуулагдамал командын бүридэлдэ оруулагдаагүй байгаа.

Тиин Елизавета Ородой Кубогта хүртэхын түлөө мүрысөөнүүдэй шатануудта һайн дүнгүүдые харуулаа. Мүнөө үедэ Ханты-Мансийска тойрогые түлөөлдэг Е. Каплина бүхы урилдаануудта түрүүлжэ гараад, Буряадай олон тоото спортдо дуратайшуулые баярлуулаа.

Тюмень хотодо түгэсэһэн Ородой чемпионадта Елизавета Каплина нэгэ алтан, нэгэ мүнгэн, нэгэ хүрэл медальнуудые абаһан байна.