803
Венгриин ниислэл Будапешт хотодо барилдаагаар Европын чемпионат түгэсэбэ. Дагестанһаа уг гарбалтай табан барилдаашад шангай һууринуудые тэндэ эзэлээ. Тэдэнэй хоёрынь алтан медальда хүртөө. Саха (Яхад) Уласай барилдаашад хари гүрэнүүдэй түлөө олоор хабаададаг болонхой. Владимир Егоров Хойто Македониин түлөө хибэс дээрэ гараад, чемпионой нэрэ зэргэдэ хүртөө. Румыниин Эдуард Григорьев хүрэл медаляар шагнагдаа.
Эхэнэрнүүдэй дунда Эстони гүрэнэй Эпп Маэ мүнгэн медаль 76 килограммай шэгнүүртэ абаа. 2021 ондо Европын чемпион болоһон энэ тамирша басаган Буряадай һоригшо Максим Молоновой ударидалга доро һүүлэй жэлдэ бэлэдхэл хэнэ.
Түрэл Буряадтаа Максим Молонов нэрэ зэргэтэй Стальвира Оршушой һоригшо юм. Хажуугаарнь ондоо гүрэнүүдтэ ошожо, барилдааша басагадаар хүдэлнэ. Тиигэжэ Максим Максимович США-гай Хелен Марулисые хэдэн жэл соо һорижо, Олимпиин орьёлдо хүргөө. Хелен 2016 ондо Олимпиин наадануудта чемпион боложо тодороо һэн.
Удаань Максим Молонов Финляндиин барилдаашан Петра Олли гэгшэтэй хүдэлөө. Петра гүрэн дотороо барилдаагаар анха түрүүшын дэлхэйн абарга боложо шадаа.
- Намтай суг хүдэлдэг һоригшонорто баяр хүргэхэ байнаб. Эстони гүрэнэй Ахто Раска Ород гүрэнэй Максим Молонов хоёр намайе бэлдээ. Эдэнэй ашаар зүүн зүгэй маягаар һорилго хээб. Иимэ бэлэдхэл абарга болоходомни, тон ехээр нүлөөлөө, - гэжэ 2018 оной дэлхэйн чемпионадай һүүлээр Петра Олли хэлэһэн юм.
Автор: Борис БАЛДАНОВ
Фото: uww.org
