Оюутад мүрысөө

Оюутадай дунда Буряадай чемпионат БГСХА-гай талмай дээрэ хэдэн жэлэй хугасаада үнгэргэгдэнэ. Юуб гэхэдэ, Самбогой федерациин мэдүүлһээр, тус һуралсалай гуламтада спорт түргэнөөр хүгжэнэ, илангаяа самбо хүтэлбэрилэгшэд дэмжэнэ.

- Академидэмнай самбо барилдаанай багша хүдэлнэ. Андрей Будажапов өөрөө мэдээжэ тамиршан байһан, дэлхэйн абарга болоһон юм. Оюутад амиды жэшээ хаража, һайн дүн харуулха бэзэ гээд һанагдана. Барилдаанай зал соо һорилго тэдэ хэнэ, тэндэнь заһабарилга хэгдэнхэй, - гэжэ БГСХА-гай ректор Бэликто Батоевич Цыбиков хөөрэнэ.

Мүнөө жэлэй мүрысөөндэ хүршэ можо хизаарнуудай түлөөлэгшэд хабаадалсаа. Тулалдаануудта оролсоһон тамиршад ганса дээдэ һургуулинуудай оюутад бэшэ юм, олонхинь дунда мэргэжэлэй училищи, колледжнуудта һурана.

- Академиин хүтэлбэрилэгшэд тус мүрысөө бүхэроссиин болгохо һанаатай. Эрхүү можын Ангарск хотоһоо, Үбэр Байгалай хизаарай Агаһаа тамиршадай ерэһэндэнь баяртайбди. Булта айлшаднай гэртээ медальтай бусаа. Урда жэлнүүдтэ тамиршад ганса спортивна самбо барилдаагаар мүрысэгшэ һэн, харин мүнөө дайшалхы самбогоор тэмсээнүүд эмхидхэгдээ. Анха түрүүшынхиеэ хибэс дээрэ эхэнэрнүүд гараа. Залуу тамиршадые дэмжэхэеэ манай нэрэ солотой самбистнар ерээ. Тэрэ тоодо дэлхэйн абарганууд Сергей Доржитаров, Баир Омоктуев, Европын чемпион Галсан Бадмацыренов болон бусад болоно. Нээлгын баяр ёһололдо, шангуудые барюулгын үедэ мэдээжэ “Алтан Булаг” ансамбль хабаадалсажа, хэмжээ ябуулгые шэмэглээ гэхэдэ, алдуу болохогүй, - гэжэ мүрысөөнэй ахамад шүүгшэ Андрей Будажапов хэлэнэ.

Апрель һарын һүүл багаар Нижегородско хизаарай Кстово хотодо оюутадай дунда Ородой чемпионат үнгэрхэ юм. Улаан-Үдэдэ болоһон мүрысөөндэ түрүүлһэн тамиршад тиишээ ошохо эрхэдэ хүртэһэн байна.