Байгалай мүльһэн дээгүүр урилдаа

- Апрель һарын һүүл багаар Баргажанай аймагай Максимихын хажуудахи Байгалай мүльһэн онсо барисатай, санаар гүйхэдэ таатай болоод байдаг гээшэ. Олон жэлэй хугасаада Баргажанай Адагай һоригшод, санашад, удаань Буряадай багшанарай дээдэ һургуулиин шабинар хабартаа һорилго хэдэг болонхой. Тиигэһээр тэдэ тусхай мүрысөө эндэ эмхидхэхэ гэһэн шиидхэбэри абаа. Мүнөө тус хэмжээ ябуулга ганса Буряадта бэшэ, мүн хари гүрэнүүдтэ мэдээжэ болоһон. Ехэ бага гэжэ илгарангүй эндэ мүрысэнэ, - гэжэ Буряад Уласай Спортын болон залуушуулай бодолгын яаманай сайд Иван Козырев хэлэнэ.

Буряадаймнай мэдээжэ санашан Алиса Жамбалова, зунай биатлоноор дэлхэйн чемпион Тимофей Лапшин, дэлхэйн чемпионадта мүнгэн медальда хүртэһэн Яна Кирпиченко гэгшэд энэ мүрысөөе шэмэглээ гэхэдэ, алдуу болохогүй. Ород гүрэнэй залуушуулай командын бүридэлдэ ородог хэдэн түрүү тамиршад мүн лэ бэеэ туршаа.

Спринт урилдаанда болон 30 модоной  зайда Алиса Жамбаловатай тэмсэхэ хүн олдоогүй. Буряадаймнай урдаа хараха санаша басаган Ород гүрэн дотороо түрүүшүүлэй тоодо дэмы ородоггүй гэжэ үшөө дахин гэршэлээ. Апрель һарын һүүл багаар Ородой Санашадай федерацида заншалта ёһоороо ехэ суглаан зарлагдаха. Тэндэнь үнгэрһэн халаанай дүнгүүд согсологдохо, суглуулагдамал командын бүридэл шэнээр баталагдаха. Алиса тэдэнэй тоодо оролсохо бэзэ гээд найдагдана.

- Һаяын үдэрнүүдтэ суглуулагдамал командада ороо гүб, али үгы гү гэжэ мэдэгдэхэ. Мүнөө үедэ һоригшогүй болоод байнхайб. Немец мэргэжэлтэн Маркус Крамер һүүлэй онсо байдалһаа боложо, манай командатай хүдэлхэеэ болинхой. Тиимэһээ һоригшодой зүблэл хэнэй ударидалга доро орохо байһыемни заажа үгэхэ, - гэжэ Алиса мэдүүлнэ.

Эхэнэрнүүдэй дунда хоёр урилдаанда шангай 2-дохи һууринуудые Буряадай гүрэнэй багшанарай колледжын оюутан, оройдоол 17 наһатай Виктория Невьянцева эзэлээ. Виктория хадаа “Номто” гэһэн спортын клубай гэшүүн юм. Буряад Уласай Арадай Хуралай һунгамал Валерий Доржиев шабиингаа урилдахые анхаралтайгаар ошожо хараһан байна.

- Һүүлэй жэлдэ Виктория Невьянцева манай клубай гэшүүн болонхой. Өөрын нюдөөр урилдааень ерэжэ хараад, баярлабаб. Юуб гэхэдэ, нэрэ солотой Яна Кирпиченко гэгшын урда орохо гээшэ бэлэн хэрэг бэшэ. Гэхэтэй хамта ганса Алиса Жамбаловада хүсэгдөө. 30 модоной зайда анха түрүүшынхиеэ гүйжэ, бэеэ туршаа. Илагшаһаа 2 минута 50 гаран секундаар үлөө. Энэ яһала бараг гээд һанагдана. Залуу басаган дүнгөө һайжаруулна бэзэ гэжэ найданабди, - гэжэ Валерий Доржиев һанамжаараа хубаалдана.

Эрэшүүлэй дунда Красноярска хизаарай Иван Горбунов 50 модоной зай эгээл түргөөр гүйжэ гараа. Иван хадаа залуушуулай дунда дэлхэйн чемпионадта шангай һуури эзэлһэн намтартай.

Улаан-Үдын 87 наһатай Владимир Арьяев, 84 наһатай Шэтэ хотын Юрий Перфильев, Москвагай 70 наһатай Елена Кулябко, Улаан-Үдын 76 наһатай Георгий Цыбиков гэгшэдые нэрлэмээр. Тэдэ эгээл ута зай гаталжа гараа гээд хэлэлтэй.