Ази түбидэ шалгараа

Нютагайнгаа хүбүүнэй барилдаае харахаяа олон нютагай хүн Монгол орон ошоһон байна. Улаан-Үдэһөө, Агаһаа хэдэн автобус тиишээ гараа. Апрелиин 23-да Арсалан Будажапов хибэс дээрэ гаража, харагшадаа баясуулаа.

2022 оной январь һарада Арсалан Будажапов Кыргызстан гүрэнэй чемпион боложо шадаа һэн. Тиигэжэ тэрэ суглуулагдамал командын бүридэлдэ оруулагдажа, Азиин чемпионадта хабаадаха эрхэдэ хүртөө бэлэй.

Улаан-Баатарай хибэс дээрэ Арсалан 79 килограммай шэгнүүртэ гараа. Урда Солонгосой тамиршаниие илажа гараад, хахад финалай уулзалгада Энэдхэг гүрэнэй тамиршанда шүүгдэшөө. Шангай 3-дахи һуури эзэлхын түлөө тэмсээн болоогүй, Арсалантай барилдаха Туркменистанай түлөөлэгшэ хибэс дээрэ гараагүй.

Арсалан Будажаповай түлөөлдэг Кыргызстанай тамиршад тус мүрысөөндэ нэгэ мүнгэн, дүрбэн хүрэл медальнуудые абаа. Эгээл һайн дүн Иранай команда харуулаа. Тэндэхи 6 тамиршад чемпионой нэрэ зэргэдэ хүртөө. Хибэсэй эзэд тус хэмжээ ябуулгада хоёр мүнгэн, нэгэ хүрэл медальнуудаар харагшадаа хүхеэгээ.

Эхэнэрнүүдэй дунда мүрысөөндэ Монголой басагад баһа чемпионууд боложо шадаагүй. Дүрбэн мүнгэн, табан хүрэл медальнууд Монголой спортдо дуратайшуулые баярлуулаа гэжэ хэлэхэнь аргагүй. Юуб гэхэдэ, барилдааша басагадтаа тэдэ тон ехээр найдажа байгаа. Долоон алтан медаль абаһан Японой тамиршад дэлхэй дээрэ эрхим гэжэ дэмы  бэшэ тоологдодог байһанаа гэршэлээ.