Тамирай шэнэ талмай

Алас Дурна зүгэй федеральна тойрогто Ород гүрэнэй Юрэнхылэгшын бүрин эрхэтэ түлөөлэгшэ Юрий Трутнев албанайнгаа хэрэгээр Буряад Уласта ерэжэ, түб нээлгын баяр ёһололдо хабаадаа.

- Иимэ һайхан, һаруул, томо тамирай комплексын  барилга  эгээл түрүүн Юрий Трутнев дэмжэһэн байна. Юрий Петрович өөрөө тамиршан юм. Киокушинкай каратэгээр 5-дахи шатын хара бүһэтэй. Тиимэһээ тамир хүгжөөлгэдэ ходо туһалжа байдаг. Иигээд лэ Алас Дурна зүгэй нэгэдэмэл субсидиин ашаар “Патриотнай” хүдэлжэ эхилбэ, - гэжэ Буряад Уласай Толгойлогшо Алексей Цыденов тэмдэглэнэ.

Шэнэ комплексын дэргэдэ һорилгын табан зал оршоно. Барилдаан, бокс, самбо, дзюдо, тхэквондо, ушу болон бусад тулалдаанай  зүйлнүүдээр тэндэ бэлэдхэл эмхидхэгдэхэ. Һорилгын үедэ хубсаһаяа һэлгэхэ, бэеэ заһаха, угааха газарнууд, 21 һууритай хонохо таһалганууд  зохёогдонхой.

- Томо универсальна залда хэдэн хибэс багтана. Үндэр үһээтэй танхимда гимнастнууд һорилго гараха аргатай болобо. Нэгэ доро 480 хүн мүрысөө хараха аргатай. Эндэ уласай болон можо хизаар хоорондын тэмсээнүүд үнгэргэгдэжэ байха, - гэжэ Буряад Уласай Спортын болон залуушуулай хэрэгүүдэй яаманай сайд Иван Козырев мэдүүлнэ.

Түрүүшын мүрысөөн тус түбтэ үнгэрһэн долоон хоногой эсэстэ эмхидхэгдээ. Барилдаашадай суглуулагдамал команданууд сугларжа, регбол наадаһан байна.