Буряадай хүүхэн-дэлхэйн абарга

Уласхоорондын тамирай талмайнуудта болоһон урилдаануудта Ород гүрэнэй түлөөлэгшэд һүүлэй үедэ хабаадаха эрхэеэ алданхай гэжэ бултанда мэдээжэ. Теэд Муай-тайын уласхоорондын федераци (IFMA) хэнһээшье айнгүй, ондоо шиидхэбэри абажа, Ородой түлөөлэгшэдые дэлхэйн чемпионадта хабаадахыень уриһан байна. Иигэжэ манай тамиршад IFMA-гай туг доро мүрысөө.

Куала-Лумпурта Анастасия Байс 12-13 наһатай басагадай дунда 32 килограмм хүрэтэр шэгнүүртэ тэмсээ. Финальна уулзалгада тэрэ Канада гүрэнэй Оливия Бахсус гэгшые шүүжэ, дэлхэйн чемпионадай алтан медаль үбсүүндээ зүүбэ.

2022 оной хабарай үедэ Анастасия Ородой чемпионадта өөрын наһанай бүлэгтэ түрүүлжэ гараад, Ородой суглуулагдамал командын бүридэлдэ оруулагдаа һэн. Дэлхэйн чемпионадай эхилтэр оройдоол нэгэ һара үлөөд байхада, урилга ерээ. Аяар холын Малайзи ошохын түлөө Буряадай эдир тамиршан Оюна Васильевна Абдулмуслимова һоригшотоёо түрүүн Улаан-Баатар автобусоор гараа. Монголой федерациин гэшүүд тэдэниие һайнаар угтажа хонуулаад, саашань Урда Солонгосой ниислэл Сеул хүрэтэр агаарай онгосодо һуулгаа. Эгээл тэндэһээ тэдэ Малайзи хүрөө.

- Анастасия Байс Ивалгын аймагай Колобки һууринай олон үхибүүтэй гэр бүлын гэшүүн. Гурбан жэлэй саана заахан Настя тайска боксоор бэеэ һорихоёо Ивалгын хүүгэдэй тамирай һургуулида ерээ һэн. Һургуулидаа эрхимээр һуража, гэртэхи газаахияа хэжэ, һорилгоёо алдангүй ябажа үрдидэг юм. Оролдосотойгоор бэлэдхэлдээ хандажа, бусадһаа үлүү хүдэлдэг заншалтай, - гэжэ Буряад Уласай Тайска боксын федерациин хүтэлбэрилэгшэ Жаргал Очиров хөөрэнэ.

Дэлхэйн шэнэ абарга Оюна Абдулмуслимова һоригшынгоо болон бусад Буряадай мэдээжэ тамиршадай ажал хэрэг үргэлжэлүүлбэ гэхэдэ, алдуу болохогүй. Оюна Васильевна 2001 ондо дэлхэйн Кубогта хүртэхын түлөө мүрысөөндэ шангай 2-дохи һуури эзэлээ һэн. 2003 ондо дэлхэйн абаргын нэрэ зэргэдэ Ксения Бальжинимаева хүртөө бэлэй. 2018 ондо эдир Екатерина Карнакова үхибүүдэй дунда дэлхэйн чемпион боложо тодороо. 2021 ондо Екатерина Карнакова Дарья Ербаева хоёр дэлхэйн чемпионадта мүнгэн медальнуудаар шагнагдаа һэн.