Түргэн шатарай мүрысөөн-Түнхэндэ

Анха түрүүшынхиеэ үнгэргэгдэһэн “Тункинская долина” мүрысөөн Буряад Уласай Толгойлогшын ба Буряад Уласай Засагай газарай Захиргаанай грантын хүсөөр эмхидхэгдээ гээд хэлэлтэй. Түнхэнэй аймагай захиргаан болон Түнхэнэй байгаали хамгаалгын үндэһэтэнэй хүреэлэн өөһэдынгөө туһа нэмэри үзүүлээ.

- Аймаг доторнай үндэр наһатайшуулай, залуушье халаанай дунда шатарта дуратайшуул олон юм, өөрын онсо баян түүхэтэй. Манай Түнхэн нютагһаа олон шатаршад ургажа гараһан намтартай. Шатар хүгжөөлгэ шэнэ шатада гараха гэжэ “Шатар – һургуулида” гэһэн бүхэроссиин түсэл бүхы һургуулинуудтаа нэбтэрүүлжэ эхилээбди. Үшөө тиихэдэ иимэ түхэлэй хэмжээ ябуулгануудые үнгэргэхэдэмнай, аймаг доторнай шатар улам хүгжэхэ гээд һанагдана, - гэжэ Түнхэнэй аймагай засаг дарга Чингис Маншеев мэдүүлнэ.

150 гаран шатаршадые тус мүрысөөн суглуулаа. Тэдэнэй тоодо уласхоорондын гроссмейстер Жамсаран Цыдыпов наадаһан байна. Буряадаймнай үшөө нэгэ шатаршан үндэр нэрэ зэргэдэ хүртэбэ гэжэ мүрысөөнэй боложо байхада мэдэгдэбэ. Уласхоорондын Шатарай федерациин (ФИДЕ) ехэ суглаанда 15 наһатай Эрдэм Хубукшановта “Уласхоорондын мастер” гэһэн нэрэ олгуулха тухай шиидхэбэри абтаа. Энэ баяртай мэдээсэл Эрдэм Аршаанда боложо байһан мүрысөөнэй үедэ дуулаа.

Түргэн шатараар болоһон шанга тулалдаануудта Жамсаран  Эрдэм хоёр һүүлшын шата хүрэтэр түрүү һуури эзэлхын түлөө тэмсээ. Уласхоорондын гроссмейстер азатай байжа, чемпион боложо тодороо. Уласхоорондын мастер болоһон Эрдэм Хубукшанов шангай 2-дохи һуури эзэлһэн байна. Бэлигтэй эдир наадагша Номина Дармаева 3-дахи һуури эзэлээ.

Тус мүрысөөндэ эрэшүүлтэй суг хамта наадаһан басагад һайн дүнгүүдые харуулжа шадаа. Эхэнэрнүүдэй дунда түрүүлһэн бүхы шатаршад эрхим 10 наадагшадай тоодо орожо шадаһаниинь һайшаалтай. Эндэ 13 наһатай Виктория Будаева алтан медаль абажа шадаа. Үбэр Байгалай хизаарай түлөөлэгшэ Анастасия Шишкарева 2-дохи һуурида гараа. Эхэнэрнүүдэй дунда уласхоорондын мастерай нэрэ зэргэтэй, 15 наһатай Агын тойрогой урдаа хараха шатаршан Яна Жапова 3-дахи һуури энэ мүрысөөндэ эзэлээ.

Үхибүүдэй дунда мүрысөөн тусхайгаар эмхидхэгдээ. 10 наһатай Софья Унгаева түрүүлжэ гараа. 11 наһатай Эрхүү можын шатаршан Ярослав Ранцан 2-дохи һуури эзэлээ. Эдир басагадай дунда Түнхэнэй аймагһаа уг гарбалтай наадагша Адьяна Саргаева түрүүлээ.

Эмхидхэгшэдэй мэдүүлһээр, иимэ мүрысөөн жэл бүри үнгэргэгдэхөөр хараалагдана.