Наһатайшуулай нааданууд

Уласай пенсионернүүдэй Спартакиада 7-дохиёо үнгэргэгдэбэ гээд хэлэлтэй. Энэ удаа үндэр наһатайшуул спортын долоон зүйлөөр бэе  бэетэеэ тэмсэһэн байна. Тус хэмжээ ябуулгада ганса хүдөө нютагуудай түлөөлэгшэд бэшэ, харин Улаан-Үдэ хотынхидшье  оролсоо. Хойто аймагуудай тамиршад нэгэ команда боложо  хамтараад, наадануудта хабаадаа. Командна тоосоондо Улаан-Үдын суглуулагдамал команда түрүү һуурида гараа. Хэжэнгын болон Түнхэнэй аймагайхид шангай 2-дохи, 3-дахи һууринуудые тус тустаа эзэлээ.

Дартс наадан олондо мэдээжэ. Арад зоной дунда хэды хүгжэнгишье һаа,  иимэ томо нааданай бүридэлдэ анха түрүүшынхиеэ оруулагдаа. Талмайн эзэд, Хэжэнгын дартс наадагшадай түрүүлһэндэнь гайхалгүй. Юуб гэхэдэ, улас дотороо тэдэ ходо түрүүшүүлэй дунда ябадаг, Буряадайнгаа түлөө бүхэроссиин болон уласхооронднын тэмсээнүүдтэ хабаададаг. Залуушуултай адли үндэр наһатайшуулшье тусхайгаар байгуулагдаһан дартс клубта бэлэдхэл хэдэг юм.

Хүнгэн атлетикээр нэгэ мянган метр зай хабаадагшад гаталаа. Эндэ Кабанскын аймагай Аркадий Белоусов болон Зэдын аймагай Ирина Жаргалова гэгшэд түрүүлээ. Ахын аймагай уран гартай оёдолшон Бавуудоржын Баярмаа шангай 3-дахи һуури эзэлээ.

Шатарай мүрысөөндэ Зэдын аймагай Баир Чагдуров 1-дэхи һуурида гаража, олониие гайхуулаа. Хориин аймагай Юрий Хагоев болон Улаан-Үдэ хотын түлөө наадаһан ФИДЕ-гэй мастер Баир Митыпов гэгшэдые хойноо үлөөжэ шадаа. Эхэнэрнүүдэй дунда ээлжээтэ амжалтаяа 81 наһатай Светлана Жеребцова туйлаа.

Шэрээгэй теннисээр хубиин тоосоондо Улаан-Үдын тамиршад чемпионой нэрэ зэргэнүүдтэ хүртөө. Эдэ хэд бэ гэбэл, Сергей Цырендоржиев Наталья Атутова хоёр болоно.

Волейболоор нааданда Буряадай ниислэлэй суглуулагдамал команда шалгараа. Хэжэнгын болон Захааминай аймагуудай команданууд шангай һууринуудта гараа.

Үндэр наһатайшуулаймнай нюдэниинь хурса, гарынь шанга байна гэжэ нааданууд харуулаа. Сагаалса буудалгаар болон һур харбалгаар мүрысөөнүүд энээниие гэршэлээ. Хүн зоной дунда “воздушка” гэжэ алдаршаһан малокалиберна винтовкоор буудахадаа, Яруунын аймагай Цырендугар Самбуев, Сэлэнгын аймагай Марина Ринчинова гэгшэд мэргэнүүд байжа, түрүүлжэ гараа.

Һур харбалгаар Тарбагатайн аймагай Дугаржап Николаев түрүүшынгээ ехэ амжалта туйлаа. Эхэнэрнүүдэй дунда Загарайн аймагай Марина Носкова 1-дэхи һуурида гаража шадаа. Абсолютна чемпион болохын түлөө мүрысөөн нааданай бүридэлдэ оруулагдаагүй байгаа. Тиимэһээ тамиршад, һоригшод, шүүгшэд хөөрэлдэжэ, тэмсээ эмхидхээ. Уласай “Наадан-Сурхарбаанда” абаргын нэрэ зүүһэн Зэдын аймагай Виктор Ринчинов энэшье удаа мэргэн байһанаа гэршэлээ.

Пенсионернүүдэй удаадахи Спартакиада 2024 ондо Ахын аймагта үнгэргэгдэхөөр түсэблэгдэбэ.