Эрхим тамиршад элирээ

Бүхэроссиин Спартакиада анха түрүүшынхиеэ эмхидхэгдэнэ гээд хэлэлтэй. Совет үедэ үнгэргэгдэжэ байһан СССР-эй арадуудай дунда Спартакиадаһаа үлүү хэмжээндэ гараха зэргэтэй юм.

Ород гүрэнэй тамиршадай уласхоорондын мүрысөөнүүдтэ хабаадахагүй сагта иимэ ехэ хэмжээ ябуулга туһатай байха гээд эмхидхэгшэд мэдүүлнэ. Энэ ушарһаа боложо, ехэнхи түрүү тамиршаднай үнинэй  мүрысэнэгүй. Тиимэһээ тэдэ арга шадалаа алдахагүй гэжэ оролдоно, тэмсээнэй үедэ бэеэ туршахаар хараална.

Олимпиин наадануудай бүридэлдэ оруулагдаһан спортын 39 зүйлөөр тамиршад мүрысэнэ. Буряад Уласай түлөөлэгшэд мүрысөөнүүдтэ оролсожо, яһала һайн дүнгүүдые харуулаа. Августын 30-ай байдалаар тэдэ 8 медальда хүртэһэн байна.

 

Бокс

Олимпиин шэгнүүрнүүдтэ ородог түрүү боксёрнууд ринг дээрэ гараа. Шэгнүүр бүхэндэ 8 эрхимэй дунда Буряадаймнай зургаан тамиршад оруулагдаһан байна.

Эрэшүүлэй дунда тэмсээндэ Баир Батлаев, Альберт Гатаулин болон Радна Цыбиков гэгшэд оройдоол нэгэ-нэгэ уулзалгануудые үнгэргэжэ диилдээ. Басагад һайн дүнгүүдые харуулаа, тэдэ гурбан медальтай гэртээ бусахань.

57 килограммай шэгнүүртэ чемпионой нэрэ зэргэдэ Людмила Воронцова хүртөө. Магаданай Дина Богданова, Хакас Уласай Саяна Казагашевае Буряадай түлөөлэгшэ шүүжэ гараа. Финальна уулзалгада Тульска можын  Дарья Абрамоватай шаасалдажа, илалта туйлаа.

- Һүүлэй жэлнүүдтэ Дарьятай ходо ехэ мүрысөөнүүдтэ уулзанабди. Хоёр дахин шүүгдээб, нэгэ дахин илалта туйлааб. Мүн бусадшье тамиршад түрүүшүүлэй тоодо оролсодог юм. Тиимэһээ уулзалга бүхэндэ бүхы арга шадалаа харуулха хэрэгтэй байгаа, хэншье миин диилдэхэеэ һанаагүй, - гэжэ Людмила Воронцова һанамжаараа хубаалдана.

75 килограммай шэгнүүртэ Буряадай тамиршад хоёр медаль абаа. Елена Гапешина шангай 2-дохи һуури эзэлээ. Дарима Сандакова хүрэл медаляар шагнагдаа. Эдэ хоёрые Краснодарска хизаарай Анастасия Шамонова шүүжэ, чемпион боложо тодороо.

 

Барилдаан

Бүхы шэгнүүрнүүдээр мүрысөө эмхидхэхэ гэжэ Ородой Барилдаанай федерациин шиидхэбэри абаһандань һайшаалтай. Буряадһаа 14 хүн хибэс дээрэ гараһан байна. Хоёр тамирша басагаднай шангай 3-дахи һууринуудые эзэлээ.

57 килограммай шэгнүүртэ Ирина Ологонова заал һаа финалда барилдаха ёһотой гэжэ олон мэргэжэлтэд мүрысөөнэй эхилээгүй байхада хэлсээ. Жээрэб татаһанай удаа хахад финалай уулзалгада Красноярска хизаарай Ольга Хорошавцеватай тэрэ барилдаа. Шэгнүүр соогоо эгээл суутай, мэдээжэ тамиршадай шанга тулалдаанда Буряадай түлөөлэгшэ диилдэшоо. Энээндэ урмаа хухарангүй, 3-дахи һуури эзэлхын түлөө уулзалгада Ирина Ологонова шалгаржа, Севастополь хотын түлөөлэгшые бэлэхэнээр илажа гараа.

65 килограммай шэгнүүртэ Татарстан Уласай залуу тамиршан Екатерина Кошкина хэзээ хэзээнэйхиһээ һайнаар барилдажа, олониие гайхуулаа. Шэгнүүрэйнгээ түрүү зэргын бүхы барилдаашадые шүүжэ гараад, 1-дэхи һуури эзэлээ. Буряадай Ульяна Тукуренова залуу басаганда баһа шүүгдэһэн байна. Тиимэһээ 3-дахи һуури эзэлхын түлөө тулалдаанда хабаадажа, Сахалинай Анастасия Парохинае 3:2 гэһэн тоотойгоор шүүгээ.

5-дахи һуури Жаргалма Цыремпилова, Балдан Цыжипов гэгшэдые нэгэшье баярлуулаагүй гэжэ ойлгостой.

 

Һур харбалга

Һүүлэй хэдэн мүрысөөнүүдтэ Буряадай харбагшад алтан медальнуудта хүртэжэ, спортдо дуратайшуулые баярлуулна. Бүхэроссиин Спартакиадада заал һаа тэдэ түрүү һуури эзэлхэ гэһэн найдал бултанай досоо байгаа ааб даа. Теэд  Буряадай харбагшад оройдоол хоёр мүнгэн медальда хүртөө.

Командна микст тоосоондо Буряад Уласые суутай Бальжинима Цыремпилов  Виктория Будаева хоёр түлөөлөө. Тэдэ финалда орожо, Москвагай түлөөлэгшэдтэй уулзаа. Нуриниссо Махмудова  Алдар Цыбикжапов хоёр Буряадай тамиршадай нэрэ солоһоонь айнгүй, шүүжэ гараа.

Буряадай эрэшүүлэй суглуулагдамал команда мүнгэн медаляар шагнагдаа. Тэдэ финалда Үбэр Байгалай хизаарай командада шүүгдээ. Бальжинима Цыремпилов, Эрдэм Ирдынеев, Эрдэм Цыдыпов гэгшэд Буряадай командын түлөө харбаа гээд хэлэлтэй.

Хубиин тоосоондо Ростовско можын суутай Елена Осипова, Үбэр Байгалай хизаарай Бэлигто Цынгуев гэгшэд түрүү һууринуудые эзэлээ. Командна тоосоондо Москвагай түлөөлэгшэд хоёр алтан медаль абаһан байна. 

Бүгэдэ буряадуудай “Алтаргана” нааданай абарга болоһон Галсан Базаржапов бусадһаа олон медальтай нютагаа бусаба. Тэрэ нэгэ алтан, хоёр мүнгэн медальнуудта хүртөө.

 

Хүнгэн атлетикэ

Буряад Уласай мүнөө үеын түрүү тамиршан Николай Вербицкий Спартакиадада хабаадажа шадаагүй. Тиимэһээ хоёр тамиршад Буряадые түлөөлһэн байна. Оксана Котыхова 800 метрэй зайда урилдаанда эрхим 10 тамиршадай дунда оролсоо.

Роман Троценко өөрынгөө эгээл һайн дүн Спартакиадын үедэ харуулжа шадаба. 1500 метр зайда тэрэ 2-дохи саг харуулаа. Мүнгэн медаль абаһан Роман баяртай байһанаа мэдүүлээ.