Урдашье, хойношье ороногүй

Эрэшүүл

Һайн дуратанай командануудай дунда Ородой чемпионадта наадажа байһан “Бурятия” команда энэ халаанаа түгэсхэхэ гү, али үгы гү гэһэн асуудал хурсаар табигдаад байгаа. Юуб гэхэдэ, мүнгэгүйһөө боложо,  Сибириин хотонуудта наадануудые үнгэргэхэнь бэрхэшээлтэй болоо. Августын һүүл багаар командын хүтэлбэрилэгшэд Буряад Уласай Засагай газарай түрүү нюурнуудаар уулзажа, энэ асуудалаа шиидхээ.

Энэ уулзалгын удаа “Бурятия” команда Новосибирск, Томск, Барнаул, Бийск гэһэн хотонуудаар ябажа наадаһан байна. Буряадай тамиршад гурба дахин шүүгдээ, нэгэ дахин илалта туйлаа. Бийск хотодо “Строитель” командые тэдэ 3:2 гэһэн тоотойгоор шүүжэ, мүрысөөнэй таблицада 6-дахи һуурида дахинаа гараа.

Мүнөөдэр, сентябриин 7-до, тэдэ Междуреченск хотодо ээлжээтэ наадаяа үнгэргэхэнь. Халаанай һүүлшын хоёр нааданиинь Улаан-Үдэдэ болохоор хараалагдана. Октябриин 7-до ба 9-дэ Буряадай ниислэлдэ Барнаул, Рубцовск хотонуудай команданууд айлшаар бууха.

 

Эдиршүүл

Эдиршүүлэй футболой лигэдэ команданууд федеральна тойрогуудаар хубаараад наадана. Алас Дурна зүгэй мүрысөөндэ анха түрүүшынхиеэ Буряадай наадагшад хабаадана гээд һануулая. Хоёр наһанай бүлэгтэ эмхидхэгдэһэн шанга тулалдаанууд эхиеэ май һарада абаад, энэ намартаа түгэсхэлдөө хүрэхэнь.

2007 оной хүбүүдэй дунда “Бурятия” командын эдиршүүл 6-дахи һуури эзэлнэ. Эндэ 12 команда наададаг юм. Сентябриин 4-дэ Буряадай наадагшад Уссурийск хотын эдиршүүлые 2:1 гэһэн тоотойгоор шүүгээ.

2006 оной хүбүүдэй дунда “Бурятия” команда Уссурийскын аха наадагшадта 2:5 гэһэн тоотойгоор шүүгдээ. Хэды тиигэбэшье тэдэ 3-дахи һуури эзэлхэ аргатай юм. Өөһэдын талмай дээрэ үлэһэн 5 нааданда амжалта туйлабал, “Бурятия” мүнгэн медальшье абажа магадгүй.

Сентябриин 11-дэ “Бурятия” команда Владивосток хотын КСШОР-ой футболистнуудые Улаан-Үдэдэ угтан абаха.

 

Эхэнэрнүүд

Буряадай суглуулагдамал команда мүнөө жэлдэ Ородой чемпионадай 1-дэхи лигэдэ наадаһан байна. «Бурятия” 2022 оной чемпионадта оройдоол 6 наада үнгэргөө. Эрхүү хотын “Байкал” командые тэдэ 1:0 гэһэн тоотойгоор илажа гараа. Бусад табан нааданда Буряадай эхэнэрнүүд шүүгдэһэн байна. Иигэжэ тэдэ мүрысөөнэй удаадахи шатада гаража шадаагүй.