Тобшо һонинууд

Сагаалса буудалга

Казань. Анха түрүүшынхиеэ эмхидхэгдэжэ байһан бүхэроссиин Спартакиадын үедэ сагаалса буудалгаар мүрысөөн үнгэргэгдэбэ. Эгээл эрхим тамиршад эндэ хабаадаа. Буряадай хоёр түлөөлэгшэд тэдэнэй тоодо оролсоһониинь һайшаалтай.

Пистоледээр буудадаг эхэнэрнүүдэй дунда Яна Енина шангай 2-дохи һуури эзэлээ. Олимпиин наадануудай хоёр дахин абарга Виталина Бацаракшинатай финалда уулзажа, суутай тамиршанда шүүгдээ.

Винтовкоор буудадаг тамиршадай дунда Анна Сушко 4-дэхи һуури эзэлбэшье, һайн үрэ дүн харуулаа гэжэ мэргэжэлтэд тэмдэглэнэ.

 

Барилдаан

Белград (Серби). Сентябриин 10-18-ай үдэрнүүдтэ барилдаагаар дэлхэйн чемпионат үнгэргэгдэхэнь. Ородой тамиршадгүй тэмсээн мүрысөөн бэшэ гэжэ бүхы спортдо дуратайшуул мэдүүлнэ.

Барилдаанай баяр ёһололдо Буряадай түлөөлэгшэ оролсохонь. Кыргызстанай түлөө барилдадаг Арсалан Будажапов хибэс дээрэ 79 килограммай шэгнүүртэ гараха юм. Энэ шэгнүүртэ 32 хүн мүрысэхэ байна.

 

Шатар

Владивосток. Зүүн зүгэй экономическа форумой үедэ түргэн шатараар уласхоорондын мүрысөөн эмхидхэгдэнэ. 11 гүрэнэй эрхим 32 шатаршадай дунда Буряадай Жамсаран Цыдыпов Сэнгдоржо Дондуков хоёр наадана.

Табан шатын  удаа уласхоорондын гроссмейстер Жамсаран Цыдыпов 6-дахи һуури эзэлнэ. Түрүүлжэ ябаһан шатаршадһаа тэрэ 0,5 очкогоор үлөөд ябана.

Тус хэмжээ ябуулгын гол нааданууд сентябриин 7-до болохоор хараалагдана.

 

Бокс

Шэтэ. Сентябриин 30-һаа октябриин 9 болотор Үбэр Байгалай хизаарай ниислэлдэ эрэшүүлэй дунда Ородой чемпионат үнгэргэгдэхэнь. 60 гаран можо хизаарай 300 гаран боксёрнууд Шэтэ ерэхээр хараалагдана.

“Мегаполис Спорт” гэһэн томо спорткомплекс соо мүрысөөн болохо. Тэндэ хоёр ринг табигдажа, нэгэ доро 500 хүн тэмсээнүүдые хараха аргатай байха.

Арс гэжэ нэрэтэй манул мүрысөөнэй һүлдэ болоо. Лата хэлэнһээ “илалта туйлаха габьяа” гэһэн удхатай.