​Тобшо һонинууд

Тайска бокс

Шэтэ. Нэгэ доро хоёр мүрысөөн эмхидхэгдээ. Ородой Кубогта хүртэхын түлөө тулалдаанууд олониие һонирхуулаа. Хажуугаарнь “Удоканские меди” бүлгэмэй мүрысөөн эмхидхэгдээ.

Ородой Кубогта Бато Бадархаев шангай 2-дохи һуури эзэлһэн байна. Тэрэ үнинэй бэлэдхэл хээшьегүй һаа, ринг дээрэ гаража, дүй дүршэлөө харуулаа.

Хоёрдохи мүрысөөндэ Буряадай тамиршад 34 медаль абаа. Анастасия Байс, Санжана Батуева, Олеся Герасимова, Ксения Гриценко, Максим Добрынин, Андрей Зарбуев, Иван Петров, Евгения Посохова, Станислав Сотников, Александр Хлебодаров, Даниил Чебунин болон Эдуард Шалуев гэгшэд өөр өөрын наһанай бүлэгүүдтэ түрүү һууринуудые эзэлээ.

 

Тамаралга

Южно-Сахалинск. Алас Дурна зүгэй федеральна тойрогой мүрысөөндэ Буряадай тамиршад һайн дүнгүүдые харуулаа.

Эгээл оло дахин шангай һуури Ксения Зубакина эзэлээ. Тэрэ 6 медальтай гэртээ бусаба. Дүрбэ дахин Ксения түрүүлжэ гараа.

Михаил Пушников хоёр алтан медальда хүртөө.

 

Баскетбол

Новосибирск. Үхибүүдэй наһанай бүлэгтэ Ородой чемпионадай нааданууд эхиеэ абаба. Түрүүшын шэлэн абалгын шатые Буряадай 4 команда дабажа гараа.

2007 оной хүбүүд өөрын бүлэгтэ чемпионой нэрэ зэргэдэ хүртэжэ, түгэсхэлэй шатада ороһон байна. 2008, 2009 онуудай хүбүүд, 2009 оной  басагад хахад финалай наадануудта хабаадаха эрхэдэ хүртөө.

Эдэ үдэрнүүдтэ 2010 ондо түрэһэн хүбүүд, басагадай дунда мүрысөөн эхиеэ абаба. Энэ наһанай бүлэг анха түрүүшынхиеэ Ородой чемпионадта хабаадана.

 

Волейбол

Эрхүү. Оюутадай волейболой лигын нааданууд эхилбэ. 24-дэхиеэ боложо байһан мүрысөөндэ Буряадай гүрэнэй ехэ һургуулиин наадагшад амжалтатайгаар хабаададаг заншалтай.

Энэ удаа тэдэ дахин шалгараа. Шэлэн абалгын шатада БГУ-гай команда 1-дэхи һуурида гаража, хабар болохо мүрысөөнэй түгэсхэлэй шатада хабаадаха эрхэдэ хүртөө.

 

Шатар

Владивосток. 9 наһа хүрөөдүй шатаршадай дунда Алас Дурна зүгэй федеральна тойрогой мүрысөөн түгэсэбэ. Буряадай хоёр эдиршүүл түрүүшүүлэй тоодо ороо.

Хүбүүдэй дунда Дмитрий Таряшинов шангай 2-дохи һуури эзэлээ. Тэрэ 9 нааданда 7,5 оноо абажа шадаа. Тэрэ түрүүлжэ гараһан Михаил Тарасенкэтэй адли оноотой байгаа. Теэд нэмэлтэ дүнгүүдээр Дмитрий мүнгэн медальда хүртэбэ.

Басагадай дунда Саруул Базыржапова 7 очко абаад, мүнгэн медаляар шагнагдаа.