Найдал түрүүлнэ

5-дахи жэлээ удаа да­раалан тус мүрысөөн Великие Луки хотодо эм­хидхэгдэнэ. Мүнөө жэлдэ хэзээ хэзээнэйхиһээ олоор тамиршад эндэ хабаадаһан байна. 35 можо хизаарай 657 залуу тамиршад наһанай хоёр бүлэгтэ хубаараад, түрүү һуури эзэлэгшэдые элирүүлбэ.

21 наһа хүрөөдүй тамир­шадай дунда мүрысөөндэ Буряадай тамиршад гурбан медальда хүртөө. Команд­на тоосоондо эрэшүүлэй суглуулагдамал команда шангай 2-дохи һуури эзэлээ. Санкт-Петербург болон Мо­сква хотонуудай тамирша­дые шүүгээд, финалда Үбэр Байгалай хизаарай команда­да тэдэ диилдэшоо. Иигэжэ Александр Гонгоров, Бато Доржиев, Санжэ Цыдыпов гэгшэд мүнгэн медаль абаба.

Хубиин тоосоондо Бато Доржиев, Светлана Харуль­чиева гэгшэд шангай 3-дахи һууринуудые эзэлээ. ДНР-эй, Ленинградай можын, Бу­ряадай, Москвагай тамир­шадые Бато илажа гараад, хахад финалай уулзалгада Чувашиин түлөөлэгшэдэ диилдээ. 3-дахи һуури эзэл­хын түлөө уулзалгада Үбэр Байгалай хизаарай Максим Цыреновые шүүһэн байна. Светлана Москва хотын гур­бан түлөөлэгшые, Дагеста­най тамиршаниие шүүгээ. Үбэр Байгалай хизаарай Ирина Дашинимаевае ила­жа, шангай 3-дахи һуурида гараа.

18 наһа хүрөөдүй наһанай бүлэгтэ Буряадай тамиршад оройдоол нэгэ медаляар шагнагдаа. Басагадай ко­манда 3-дахи һуурида гараа. Адиса Гергенова, Алексан­дра Дашиева, Санжана Жиг­житова гэгшэд хүрэл медаль абахын түлөө Ханты-Манси­ин тойрогой тамиршадые диилэһэн байна.

Бүхэроссиин мүрысөөндэ хабаадагшад Псковой можын Великие Луки хотоһоо Московско можын Красногорск хото ошо­бо. Эдэ үдэрнүүдтэ тэндэ Ород гүрэнэй генеральна прокуророй шангуудта хүртэхын түлөө бүхэроссиин мүрысөөн болохоор хараа­лагдана.