Шагналнуудта хүртөө

Эрэмдэг бэетэйшүүл Ородой Кубогта, ехэшүүл Ородой чемпионадта амжалтануудые туйлаа гээд, урдахи нэгэ дугаарта дуулгаһан байнабди. Бусад баяртай мэдээсэлнүүдтэй танилсуулхамнай.

 

Ородой Кубогта хүртэхын түлөө мүрысөөндэ Буряадай тамиршад табан медальда хүртөө. Энэ удаа тэдэ чемпионууд боложо шадаагүй. Хубиин тоосоондо Эржена Очирова шангай 2-дохи һуурида гараа. Эржена хоёрдохи жэлээ энэ мүрысөөндэ мүнгэн медальда хүртэнэ.

Ородой Һур харбалгын федерациин Кубогта хүртэхын түлөө тэмсээндэ Буряад тамиршад баһа табан медаль абаа. Классическа номо  һуршаар харбадаг суглуулагдамал команда түрүүлжэ шадаа. Анна Барадиева, Виктория Будаева болон Соёлма Сыренова гэгшэд командна алтан медалиин түлөө харбаа. Буряадай гүрэнэй хүдөө ажахын академиин оюутан Саглай Шалык бүхэроссиин талмайда түрүүшынгээ медальнуудые абаһан байна.

“Русская зима-2023” гэһэн уласхоорондын мүрысөөндэ Ород гүрэнэй тамиршадтай Беларусиин, Узбекистанай, Казахстанай харбагшад хабаадаа. Эндэ Буряадай тамиршад гурбан түрүү һуурида гараһаниинь һайшаалтай. Баир Цыбекдоржиев хубиин тоосоондо Беларусь Уласай түлөөлэгшые түгэсхэлэй шатада илажа гараа. Баир үшөө нэгэ алтан медаль командна тоосоондо абаа. Суутай Бальжинима Цыремпилов болон Сергей Цыренов гэгшэд эндэ харбаа. Светлана Дашанимаева, Эржена Очирова болон Инна Степанова гэгшэд командна тоосоондо чемпионууд боложо тодороо.

Үнгэрһэн амаралтын үдэрнүүдтэ залуушуул болон эдиршүүл талмай дээрэ гараһан байна. Буряадай ургажа ябаа залуу халаан спортдо дуратайшуулые 6 медаляар баясуулба. Тэдэнэйнь тоодо алтан медаль үгы байшоо. Хубиин тоосоондо 18 наһа хүрөөдүй тамиршадай дунда Александра Дашиева 2-дохи һуури эзэлээ, финалда Москва хотын Касандра Берзанда шүүгдээ. Шангай 3-дахи һуурида Савелий Шатаев гараа. Бусад медальнуудые Буряадай харбагшад (зураг дээрэ) командна тоосоондо абаһан байна.

Ород гүрэнэй харбагшад уласхоорондын мүрысөөндэ хабааданагүй гээд бултанда мэдээжэ. Теэд һүүлэй үедэ уласхоорондын олимпиин халаанай бэлдэһэн зарим мэдүүлгэнүүд найдал түрүүлнэ. Тиимэһээ харбагшад тэндэ хабаадахаяа бэлэн байһанаа гэршэлээ.