1445
Захаамин аймагай һунгамалнуудай Зүблэлэй шангуудта хүртэхын түлөө шатараар мүрысөөн январиин 11-12-ой үдэрнүүдтэ үнгэргэгдэжэ, 164 хабаадагшые суглуулһан байна. Заха холо Захааминда Зэдэ, Ивалга, Хурамхаан, Сэлэнгэ аймагуудай болон Улаан-Үдэ хотын айлшад буугаа. Тэдээнтэй аймагай 11 һууринай түлөөлэгшэд хүсэ шадалаа туршалсаа.
Энэ мүрысөөн зургаадахияа болоно гээшэ. Тиимэһээ жэлһээ жэлдэ эмхидхэлгэ үндэр хэмжээндэ хүрэнхэй гэжэ хабаадагшад тэмдэглэнэ. Шатаршад ганса хюлгэ хараад һуугаа бэшэ, мүн автобусоор аяншалгада гаража, аймагай һайхан газарнуудтай танилсаа. Хабаадагшад буряад һайхан эдеэ хоол, тэрэ тоодо Захааминда ажаһуугшадай замбаа амсажа баярлаа. Аймагта хүдэлдэг спортын инструкторнууд эмхидхэгшэдтэ, шүүгшэдтэ ехэ туһа хүргэжэ, ажалыень бага зэргэ хүнгэн болгоо гээд хэлэлтэй.
Хоёр үдэрэй шанга тулалдаануудай удаа дүрбэн наһанай бүлэгтэ илагшад тодорһон байна.
2010-2012 оной бүлэгтэ 33 эдиршүүл наадаһан байна. Эндэ Закаменск хотын Роман Гомбоев болон Аяна Аршанова гэгшэд нэгэдэхи һууринуудта гараа. Һонирхолтойнь гэхэдэ, Аяна бусадһаа бага наһатай байшоо.
2007-2009 онуудай 62 хабаадагша сооһоо эгээл олон очко Закаменск хотын Адиса Батуева абажа шадаа. 8 очкотой түрүү һуури эзэлэгшэһээ 0,5 очкогоор бага дүн Хурамхаанай Содном Аюшиев харуулаа.
2001-2003, 2004-2006 онуудай тамиршад ехэшүүлтэй хамта нэгэ мүрысөөндэ оролсоһон байна. Эхэнэрнүүдэй дунда 19 хүн тулалдаануудта оролсоо. Енгорбой һууринай Ургы Батуева болон Закаменск хотын Сойжина Мункуева гэгшэд эдиршүүлэй дунда шалгараа. Ехэшүүлэй дунда Ивалга аймагай Ариана Дондупова нэгэдэхи һуури эзэлээ. Ариана хадаа бүхы 9 уулзалга шүүһэн байна.
Закаменск хотын Бато Цыреторов болон Ошор Будаев өөрынгөө наһанай бүлэгүүдтэ шалгараа. Ехэшүүлэй дунда һайн дүнгүүдые Гусиноозёрск хотын шатаршад харуулаа. Эдвард Григорян болон Анатолий Рушаков гэгшэд 1-дэхи, 2-дохи һууринуудые эзэлжэ, гол шангуудта хүртөө. Тиихэдэ Гусиноозёрскын Александр Дымбрылов аха захатанай бүлэгтэ чемпион боложо тодороо.
Анна Огороднигой гэрэл зураг
Автор: Борис БАЛДАНОВ
