906
Байгша оной февралиин 19-дэ Буряад Уласай тамирай болон спортын һалбариин хүгжэлтэдэ горитой хубитаяа оруулһан хүнүүд «Алтан Олимпын» орьёлдо гараха юм. 2018 оной дүнгүүдээр тамирай һалбариин эрхимүүд 23 номинацида шэлэгдэхэ.
Буряад уласай тамирай болон спортын һалбариин «Алтан Олимп -2018» гэһэн шанда хүртэхэ талаар мэдүүлгэнүүд оруулагдажа эхилээ.
«Бидэндэ энэ хадаа жэлэй шухала хэмжээ ябуулгануудай нэгэн болоно. Тамиршад, һоригшод, сэтгүүлшэдтэ, тамирай һалбариин хүдэлмэрилэгшэдтэ бидэ баяраа хүргэнэбди. Жэл бүри номинаци бүхэндэ олон мэдүүлгэ ородог, эрхимүүдые нь шэлэдэгбди», - гэжэ Буряад Уласай Спортын болон залуушуулай бодолгын талаар сайдай орлогшо Иван Козырев хэлэбэ.
Олон зониие спортдо хабаадуулха талаар горитой ажал ябуулдаг спортын болон тамирай һалбариин хүдэлмэрилэгшэд, эмхи зургаанууд, нютагай засагай байгууламжанууд «Алтан Олимп -2018» гэһэн шанда хүртэхэ аргатай.
Февралиин 8 болотор шанда хүртэхэ талаар мэдүүлгэнүүд оруулагдаха юм. Тамирай һалбариин хүдэлмэрилэгшэд яажа сэгнэгдэхэб, номинаци бүхэнэй мэдүүлгэ хаана оруулагдахаб гэжэ Буряад уласай спортын болон залуушуулай бодолгын яаманай сайтда хараха аргатайт.
Тиихэдэ эрхим тамиршан, эрхим һоригшо, эдир эрхим тамиршан, эдир тамиршын эрхим һоригшо, инваспортын эрхим тамиршан, инваспортын эрхим һоригшо, эрхим ветеран тамиршан, эрхим шүүгшэ, спортын һалбариин Буряадай эрхим аймаг, олимпиин наадануудай тамирай эрхим федераци, олимпиин бэшэ наадануудай тамирай эрхим федераци, тамирай командна наадануудай эрхим федераци, «Эрхим эбээн тэдхэгшэ», «Эрхим инвестор», спортын һалбариин эрхим сурбалжалагша, Буряад уласай хотын тойрогуудай тамирай эрхим һургуулии, Буряад уласай хүдөө нютагуудай тамирай эрхим һургуули, Буряад уласай олимпиин наадануудай халаанай тамирай эрхим һургуули, ехэ һургуулинуудай дунда тамирай ажалай эрхим эмхидхэл, дунда мэргэжэлэй һургуулинуудай дунда тамирай ажалай эрхим эмхидхэл, хүүгэдэй эмхинүүдэй дунда тамирай ажалай эрхим эмхидхэл, тамирай эрхим клуб, тамирай болон спортын эрхим һоригшо гэһэн 23 номинацида тамирай һалбариин хүдэлмэрилэгшэд урмашуулагдаха.
