981
Красноярск хотодо эдэ үдэрнүүдтэ үбэлэй тамирай наадануудай Дэлхэйн Универсиада үнгэржэ байна. Тамирай хэмжээ ябуулгада Буряадһаа гарбалтай тамиршан Алиса Жамбалова 5 модоной зайда санаар мүрысөөндэ түрүүлбэ.
Санаар мүрысөөндэ 68 хабаадагшадай дундаһаа Алиса Жамбалова урилдаанда эгээл һүүлдэ гараһан байна. Тиигэбэшье 5-дахи һуурида ябаһанаа, хүсэ шадалаа эршэдэжэ, амжалта туйлаа.
Доржо Банзаровай нэрэмжэтэ Буряадай гүрэнэй ехэ һургуулиин оюутан Алиса Жамбаловада Ородой Холбоото Уласай Юрэнхылэгшэ Владимир Путин болон университедэй тамирай уласхоорондын федерациин юрэнхылэгшэ Олег Матыцин гэгшэд алтан медаль барюулаа.
Урилдаанда хабаадахадаа, ехэ һанаата болоһон тухайгаа Алиса Жамбалова хэлэһэн байна.
- Универсиадада ерэхэдээ, командаяа хүтэлэн ябанаб гэхэдээ, ехэ һанаата болооб. Австриһаа ерэтэр, харгы холо, часай һэлгээн – эдэ бүгэдэһөө боложо, урилдаанда бүхы шадалаа харуулжа шадахагүйб гэжэ айгааб. Тиигэбэшье мүрысөөнэй үедэ һоригшод намда хэдыдэхи ябаһан тухайм мэдээсэл дуулгажа байгаа. Тиигэһээр байтараа, һанаата болохоо болёод, хүл хүнгэн болоод, урагшаа дабшааб, - гэжэ Универсиадын чемпион хөөрэбэ.
Үбэлэй Универсиадын дирекциин мэдээсэлэй албанай гэрэл зураг
