959
Майн 17-19-нэй үдэрнүүдтэ Улаан-Үдын физкультурын-тамирай комплексдо Буряад Уласай Толгойлогшын шанда хүртэхын түлөө «BAIKAL OPEN» гэһэн уласхоорондын XXIV мүрысөөн эмхидхэгдэхэ.
Байгша оной хэмжээ ябуулгада шэнэлэлтэ оруулагдаа. Тиигэжэ эрэшүүлтэй хамта эхэнэрнүүд сүлөөтэ барилдаагаар хаба шадалаа туршаха. Уласхоорондын хэмжээнэй тамирай хэмжээ ябуулгада 13 гүрэнэй 200-һаа дээшэ тамиршад хибэс дээрэ уулзажа, эгээл бүхэшүүл элирүүлэгдэхэ. Доминикана, Солонгос, Венгри, Казахстан, Таджикистан, Украина, Беларусь, Турци, Киргизи, Азербайджан, Хитад, Монгол болон Ородой Холбоото Уласай барилдаашаад урилдаанда хабаадаха юм.
Анха түрүүшынхиеэ сүлөөтэ барилдаагаар мүрысөөн 1996 оной сентябрь һарада эмхидхэгдэжэ, эндэ һаял ургажа ябаһан тамиршад хабаадаа һэн. Удаадахи жэлдэнь тус урилдаан уласхоорондын хэмжээндэ гаража, хүршэ гүрэнүүдэй тамиршад мүрысэхэеэ ерээ. 2004 ондо тус хэмжээ ябуулга Барилдаанай уласхоорондын федерациин (FILA) литэдэ оруулагдажа, «А» классай уласхоорондын мүрысөөнэй зэргэтэй болоһон байна.
Буряад Уласай Толгойлогшын шанда хүртэхын түлөө «BAIKAL OPEN» урилдаанай шангай жаса 5 сая түхэриг юм. Үнэтэ бэлэгтэ хүртэхын түлөө эрэшүүл – 10 шэгнүүртэ, эхэнэрнүүд 6 шэгнүүртэ барилдаха
Һүүлэй үедэ тамирай томо хэмжээ ябуулганууд байгаали хамгаалгын асуудалнуудта олониитын анхарал хандуулна. Тиимэһэн сүлөөтэ барилдаагаар урилдаан «BAIKAL OPEN» гэжэ нэрлэгдэжэ, асари ехэ Байгал далай аршалан хамгаалха хэрэгтэ хабаадахыень дэлхэйн ажаһуугшадые уряална.
Тамирай һонирхолтой хэмжээ ябуулга хараха дуратайшуул биледүүдые худалдан абаха аргатай.
Анна Огорднигой гэрэл зураг
