​​Улаан-Үдэдэ Ородой залуушуулай үдэртэ зорюулагдаһан хэмжээ ябуулганууд эмхидхэгдээ

Улаан-Үдэ хотын Соведүүдэй талмай дээрэ Ородой залуушуулай үдэртэ зорюулагдаһан хэмжээ ябуулганууд эмхидхэгдээ.

Аюултай тамирай зүйлнүүдээр мүрысөөн үнгэргэгдөө, мүн бэеэ хамгаалха арганууд харуулагдаа. Эдэ бүгэдөөр һонирхожо, олон залуушуул суглараа юм.

- Мүнөөдэрэймнай һайндэрэй гол хэмжээ ябуулга гэхэдэ, скейтбордингоор мүрысөөн болоно. Үнинэй бэеэ һоригшод мүрысэжэ, дүй дүршэлөө харуулаа. Мүн тиихэдэ һаял эхилжэ байһан тамиршадай хабаадалсаһандань баяртайбди, - гэжэ хэмжээ ябуулгын хүтэлэгшэ Александр Трофимов хэлээ.

Иимэ мүрысөөн август һарада Улаан-Үдэдэ бүри үргэнөөр эмхидхэгдэхээр түсэблэгдэнхэй. Шэтэ, Эрхүү, Красноярск, Ангарск, Братск хотонуудһаа залуушуул ерэжэ хабаадаха юм. Эмхидхэгшэд засаг зургаануудай анхарал татахаяа һанана. Юундэб гэхэдэ, залуушуул жэлэй дүрбэн сагта бэеэ һорижо байха байшан үгы юм.

Александр Трофимовай онсолһоор, аюултай тамирай зүйлнүүд Олимпиин наадануудта оруулагданхай. Тиимэһээ һайн байшан соо бэеэ һорибол, ерээдүйдэ чемпионуудшье ургажа болохо.