​​Дэлхэйн чемпионууд хабаадаа

Буряад орондо даам наадал­гын эхи табиһан Феликс Завелинскиин мүнхэ ду­расхаалда зорюулагдаһан бүхэроссиин мүрысөөн июлиин 10- 13-ай үдэрнүүдтэ үнгэргэгдэбэ.

Феликс Александрович Заве­линский үшөө 1960-аад онуудаар Улаан-Үдын авиационно завод­то хүдэлхэ зуураа Буряадта анха түрүүшынхиеэ даам нааданай секци байгуулаа. Дуратай хэрэгтээ бүхы наһаяа зорюулжа, олон тоото шаби­нарые бэлдэһэн байна. Багшынгаа дурасхаал мүнхэлхын тула даамшад бүхэроссиин мүрысөө дүрбэдэхи жэ­лээ эмхидхээ гээд хэлэлтэй.

Мүнөө жэлэй тулалдаануудта 106 тамиршан, тэрэ тоодо дүрбэн гроссмейстер хабаадаа. Саха (Яхад) Уласһаа хоёр дэлхэйн чемпион ерэжэ, мүрысөө үндэр хэмжээндэ гаргаа. Мүн тиихэдэ Свердловско, Эрхүү, Челябинска, Амарай мо­жонуудай, Алтайн, Үбэр Байгалай хизаарнуудай, Ханты-Манси той­рогой, Санкт-Петербург хотын айл­шад тулалдаанда оролсоо.

Мүрысөөн хоёр бүлэгтэ үнгэргэгдөө. Дээдэ лигэдэ ехэ рей­тингтэй тамиршад эрхимүүдээ элирүүлээ. Нэгэдэхи лигэдэ бусад хабаадагшад наадаа.

Дэлхэйн чемпион байһан Николай Стручков хоёр дахин илалта туйлаа. Нэн түрүүн гол мүрысөөндэ шалгараа. Түргэн да­амаар тэрэ абажа боломоор 9 очко абажа шадаа.- Гурбадахи жэлээ эндэ хабааданаб. Мүрысөөн угаа һонирхолтойгоор эмхидхэгдэнэ. Бэлигтэй, бэрхэ олон даамшад эндэ наадана. Буряадай гроссмейстер Баир Ринчиновтэй тулалдаха­да, эгээл хүндэ байгаа. Теэд энэ хүниие шүүбэл, заабол түрүүлхэб гэжэ зосоогоо һанааб, - гэжэ Са­ха-Яхадай түлөөлэгшэ Николай Стручков хэлэнэ.

Дэлхэйн чемпионуудай наада Баир Ринчинов харана

2019 оной дэлхэйн чемпи­он Андрей Федотов шангай II һуурида гараа. Баир Ринчинов III һуури эзэлээ.

Дээдэ лигын эхэнэрнүүдэй дунда мүрысөөндэ түрүү һуури- нуудые Эрхүү можын Татьяна Баядаева болон Екатерина Бобоева гэгшэд эзэлээ. Шангай III һуурида Улаан-Үдэ хотын Ринчима Бадмацыренова гараа.

Нэгэдэхи лигэдэ хоёр жэлэй хугасаада ганса шангай һуури эзэлһэн аад, түрүүлээгүй байһан Улаан-Үдын Евгений Ненастьев одоошье илажа гараһан байна. Эрхүү можын Руслан Ажанов болон Вячеслав Сербаев гэгшэд шангай һууринуудые эзэлээ.

Эхэнэрнүүдэй дунда Эрхүү можын Любовь Алсаева болон Түнхэн аймагай Зина Дашеева гэгшэд тон адли 5,5 очконуудтай мүрысөөгөө түгэсөө. Эндэ Эрхүүгэй түлөөлэгшэ чемпион боложо тодороо. Загарай аймагай Доодо Тайлса һууринай 10 наһатай Сарюна Гомбоева хүрэл медальда хүртөө.

Түргэн даам наадалгада Николай Стручков болон Татьяна Баядаева хоёр түрүүлһэн байна. Мүрысөөндэ хабаадаһан бүхы тамиршад хубаарангүй нэгэдэжэ, эндэ наадаа.

Табадахи мүрысөөндэ үшөө олон тамиршад хабаадаха бэзэ гээд найдагдана.

Борис БАЛДАНОВАЙ гэрэл зурагууд