​​Ородой Кубогта хүртэхын түлөө һур харбалгаар мүрысөөндэ Буряадай тамиршад 8 медаль абаа

Буряад Уластамнай һаяхана Оро­дой Кубогта хүртэхын түлөө һур харбалгаар мүрысөөн үнгэргэгдэбэ. Эндэ эрэм­дэг бэетэйшүүл хабаадаһан байна. Буряадай түлөөлэгшэд 8 медаль абажа, һайн дүнгүүдые харуулжа шадаа.

Энэ хадаа эрэмдэг бэетэйшүүлэй байгша оной түгэсхэлэй тулалдаан болоо гээд хэлэл­тэй. Августын 17-18-да Ород гүрэнэй табан тамиршад Европын Кубогта хүртэхын фи­нальна шатада хабаадаха юм. Тэрэ тоодо Бу­ряадаймнай Баир Шигаевай оролсоһониинь һайшаалтай. Мүнөөнэй мүрысөөндэ Баир ха­баадажа шадаагүй. Юуб гэхэдэ, Красноярск хотодо бэе махабадаа шэнжэлэн шалгуулжа байгаа.

Буряадай тамиршадай ахамад һоригшо Цыденбал Цыренжапов һур харбагшадай дүнгүүдые үндэрөөр сэгнээ.

Хүзүүгээ гэмтээһэн тамиршадай дунда Чингис Бальжиев Буряадай үшөө нэгэ тамир­шан Александр Дорофеевтэй финалда уулза­жа, илалта туйлаа.

Блочно номо һуршаар харбалгада Татьяна Андриевскаятай тэмсэхэ хүн олдоогүй. Бадма Хаминдаев шангай гурбадахи һуурида гараа.

Классическа номо һуршаар харбалгада Сергей Хутаков эрхим байһанаа дахинаа гэр­шэлээ. Эхэнэрнүүдэй дунда Даша Дольжина гурбадахи һуури эзэлээ.

Командна тоосоондо Буряадай суглуулаг­дамал команданууд нэгэ алтан, хоёр мүнгэн медаль абаба. Блочно номо һуршаар харбадаг эрэшүүл чемпионууд боложо тодороо. Бадма Хаминдаев, Баярто Базаров болон Евгений Хоборков гэгшэд түрүүлһэн командын түлөө харбаа.

Цыденбал Цыренжаповай хэлэһээр, 2019 оной халаан хэды түгэсэбэшье, шанга һорилгонууд үргэлжэлхөөр хараалагдана. Юуб гэхэдэ, 2020 ондо Паралимпиин наадануудта хабаадаха Ородой суглуулагдамал командын бүридэлдэ тамиршаднай орохо түсэбтэй.