​Буряад Уласай Түнхэн аймагта хүүгэдэй тамирай нааданууд үнгэргэгдэбэ

Борис Балдановай гэрэл зураг

Хүүгэдэй уласай тамирай нааданууд Түнхэн аймагта сентябриин 3-6 үдэрнүүдтэ үнгэргэгдэбэ. 25 командаһаа Улаан-Үдэ хотын Октябрьска аймагай түлөөлэгшэд түрүү һуури эзэлһэн байна.

Гурбан үдэрэй туршада 1456 хабаадагшад спортын найман зүйлөөр мүрысөө. Тэдэ электропоездоор Слюдянка хүрэтэр ерээд, удаань Түнхэн аймаг хүрэһэн байна. 57 автобусоор эдиршүүл уласай хэмжээнэй мүрысөөндэ ерээ гэжэ эмхидхэгшэд тэмдэглэбэ.

Буряад Уласай Засагай газарай Түрүүлэгшын орлогшо Вячеслав Цыбикжапов болон спортын болон залуушуулай бодолгын талаар сайд Вячеслав Дамдинцурунов нээлгын баяр ёһололдо хабаадагшадые амаршалаа.

- Эндэ хабаадаһан үхибүүн бүхэн ехэ жаргалтай хүнүүд гээшэ. Мүнөөдэрэй сэбэр агаартай стадион дээрэ эмхидхэгдэнэ. Тиимэһээ булта һайн дүн харуулжа, олон тоото харагшадые, түрэл гаралаа баярлуулха бэзэ гээд найдагдана, - гэжэ Вячеслав Цыбикжапов тэмдэглээ.

2018 ондо засаг газарай түрүүлэгшын орлогшын үүсхэлээр хүүгэдэй нааданууд эмхидхэгдэжэ эхилээ һэн. Нёдондо бүхы уласаймнай үхибүүд Сэлэнгэ аймагта мүрысөөндэ сугларжа, удаань хүүгэдэй тамирай наадануудай туг Түнхэн аймагта дамжуулагдаа.

Һур харбалга

100 харбаашадай дунда оройдоол хоёр тамиршад спортын мастер гэһэн үндэр нэрэ зэргэтэй байгаа. Тэдэл хубиин тоосоондо түрүү һууринуудые эзэлээ.

Басагадай дунда Мария Коногорова финалда Дари Доржиевае шүүгээ. Эдэ хоёр Железнодорожно аймагай түлөөлэгшэд юм. Хүбүүдэй дунда Этигэл Цыденов Сергей Матвеевһээ мэргэнээр харбажа,чемпион болоо. Командна тоосоондо хоёр алтан медаль Улаан-Үдын Железнодорожно аймагай тамиршад абаа. Тиигэжээнэ аймагай түлөөлэгшэд бүхы түрүү һууринуудые эзэлһэн байна.

Борис Балдановай гэрэл зураг

Барилдаан

Мүрысөөндэ дүрбэн шэгнүүртэ бүхэшүүл элирүүлэгдээ. Дүрбэн ондоо аймагуудай түлөөлэгшэд алтан медальнуудые абаһаниинь, үхибүүдэй дунда барилдаан хүгжэжэ байһаниие гэршэлнэ гэхэдэ, алдуу болохогүй.

44 килограмм хүрэтэр шэгнүүртэ Түнхэн аймагай түлөөлэгшэ Вячеслав Гармаев чемпион болоо. Нээлгын баяр ёһололой үедэ тэрэ мэдээжэ шатаршан Инна Ивахиноватай хамта нааданай гал носооһон байна. Хяагта, Ивалга, Ярууна, Түнхэн, Зэдэ, Баргажан гэһэн аймагууд командна тоосоондо шалгараа.

Хара-сагаан хюлгын саана

Даам наадалгаар Түнхэн аймагай команда түрүүлжэ гараа. Очир Ирдынеев болон Виктория Хосомоева гэгшэд Бэшүүр болон Загарай аймагуудай тамиршадые хойно үлөөгөө. Виктория нээлгын баяр ёһололой үедэ гал носоолгын хэмжээндэ хабаадалсаһан байна гээд хэлэхэ шухала.

Шатарай мүрысөөндэ түрүү гурбан һуури Улаан-Үдэ хотын гурбан аймагуудай команданууд эзэлээ. Октябрьска аймагай түлөө наадаһан Дарима Саргаева болон Тумэн Цыбиков гэгшэд нэгэдэхи һуурида гараа. Дарима эжы абынгаа түрэһэн нютагта нэгэшье очко алдаагүй.

Борис Балдановай гэрэл зураг

Ярууна, Захаамин болон Сэлэнгэ аймагуудай шатаршад эрхим зургаан командануудай тоодо ороо.

Хүнгэн атлетикэ

Хэрэн һууринай мэдээжэ ниитын болон политическэ ажаябуулагша Владимир Сагановай нэрэмжэтэ түбэй стадион дээрэ хүнгэн атледүүд мүрысөө.

Зэдэ, Кабанск, Хурамхаан, Загарай болон Октябрьска аймагай командануудай түлөөлэгшэд алтан медальнуудта хүртөө. Чемпионой нэрэ зэргэдэ Зэдэ аймагай Кристина Дементьева хоёр дахин хүртөө. Энэ басагые “зэдын годли” гэжэ дэмы нэрлэнэгүй.

Бүмбэгэтэ нааданууд

Уласай тамирай хүүгэдэй наадануудта бага футболоор үхибүүд мүрысөө. Хүбүүдэй дунда финалда Улаан-Үдэ хотын Октябрьска аймагай команда Северобайкальск хотын наадагшадтай уулзаа. Эндэ ниислэлэй футболистнууд 2:1 гэһэн тоотойгоор илалта туйлаа. Басагадай дунда Сэлэнгэ аймагай тамиршад Хэжэнгэ аймагай түлөөлэгшэдые финалда шүүжэ, нэгэдэхи һуури эзэлээ.

Борис Балдановай гэрэл зураг

Волейболоор Зэдын команданууд һайн дүнгүүдые харуулаа. Хүбүүдынь чемпион боложо тодороо, басагадынь шангай хоёрдохи һуурида гараа. Хяагта аймагай басагад түрүүлһэн байна.

Столой теннисэй мүрысөөндэ Железнодорожно аймагай команда түрүү һуури эзэлээ. Октябрьска болон Хяагта аймагуудай наадагшад мүнгэн болон хүрэл медальнуудые абажа шадаа.

Октябрьска аймагай эрхим хүүгэд

Бүхы спортын зүйлнүүдээр мүрысөөнэй түгэсэһэнэй удаа командна тоосооной дүнгүүд элирээ. Эндэ Октябрьска аймагай команда гол шанда хүртөө. Шангай һууринуудта Кабанск болон Сэлэнгэ аймагуудай үхибүүд гараа. Эрхим зургаан командануудай тоодо Хяагта, Зэдэ, Ярууна аймагуудай команданууд ороо.

Тиигэжэ нааданай туг Улаан-Үдэ хотодо дамжуулагдаа. 2020 ондо Буряадай ниислэлдэ тон хэрэгтэй хэмжээ ябуулга болохоор хараалагдана.

Борис БАЛДАНОВ.

Авторай зурагууд.