​​Ерээдүйдэ нүлөөлхэ илалтанууд

Александр Богомоев

Заншалта болоһон энэ мүрысөөндэ 15 гүрэнэй 142 хүн хибэс дээрэ гараа.

Александр Богомоев 65 килограмм хүрэтэр шэгнүүртэ һаянайл барилдажа эхилбэ. Долоон хоногой урдахана Кемерово хотодо болоһон мүрысөөндэ энэ шэгнүүртэ Александр бирагүйдөө һэн. Харин мүнөө һайн барилдаа харуулжа, финалда гаража шадаа. Эндэ Буряадай тамиршан гурбан уулзалгада илалта туйлаа. Нюрганайнгаа нэгэ бага үбдэһэнһөө боложо, финалда барилдахаяа гараагүй. Тиимэһээ Эрхүү можоһоо гарбалтай Юлиан Гергенов чемпион боложо тодороо.

Һүүлэй һарада Балдан Цыжипов уласхоорондын хоёрдохи томо мүрысөөндэ шалгарба гээшэ. Энэнь ехэ удхатай. Юундэб гэхэдэ, эгээл иимэ мүрысөөнүүдэй үедэ Ородой суглуулагдамал командын бүридэлдэ оруулагдаха тамиршадые һоригшод шэлэнэ, барилдааень шэнжэлнэ. Юундэб гэхэдэ, 125 килограмм хүрэтэр шэгнүүртэ Ородой түлөөлэгшэ дэлхэйн чемпионадта шангай һуури эзэлжэ шадаагүй. Тиимэһээ 2020 оной Олимпиадада хабаадаха эрхын түлөө шанга тулалдаан болохоор хүлеэгдэнэ. Тиимэһээ Балдан Цыжиповтэ яһала һайн арга боломжо олгогдобо.

Нефтеюганскын хибэс дээрэ Балдан ганса Украинын Даниил Картавый гэгшэдэ шүүгдэһэн байна. III һуури эзэлхын түлөө Ородой болон Германиин барилдаашадые илажа, хүрэл медальда хүртөө.

Олимпиин наадануудта хэн хабаадахаб гэһэн асуудалда харюу апрелиин 23-27-ой үдэрнүүдтэ Улаан- Үдэдэ үгтэхэ. Эгээл эдэ үдэрнүүдтэ Буряадай ниислэлдэ Ород гүрэнэй чемпионат болохоор хараалагдана. Тэрээндэ чемпион болоогүй һаа, Буряадай тамиршад Токио ошожо шадахагүй.

Борис БАЛДАНОВАЙ гэрэл зураг