​​Сэрэгшэдэй сэнтэй медальнууд

Шангай II һуурида гараһан басагаднай

Аяар холын 1948 ондо байгуулагдаһан сэрэгэй спортын уласхоорондын эблэлэй ударидалга доро эдэ нааданууд эмхидхэгдэнэ. Эблэлэй бүридэлдэ 135 гүрэн тоологдоно. Харин Ородой Холбоото Улас 1995 онһоо эблэлэй бүридэлдэ хамааржа, бүхэдэлхэйн сэрэгэй наадануудта хабаадажа эхилээ.

Мүнөө жэлэй хэмжээ ябуулгада 109 гүрэн түлөөлһэн 9 300 гаран сэрэгшэ оролсоо гээд, эмхидхэгшэд мэдүүлнэ. Тамиршад спортын 27 зүйлөөр мүрысэһэн байна. Ород гүрэнэй түлөөлэгшэд 23 зүйлөөр бэеэ туршаа.

Буряадаймнай һур харбагшад һайн дүнгүүдые харуулаа гээд, абаһаар лэ хэлэхэ хэрэгтэй. Юундэб гэхэдэ, урид тэдэн орой намар болотор Олимпиин 70 метр зайда харбажа байгаагүй ха юм. 2020 оной Олимпиин наадануудай урдахана иигэжэ бэеэ бэлдэжэ байһыень тэмдэглэмээр.

Мэдээжэ тамиршан Инна Степанова эдэ наадануудта гурбан медаль абажа, спортдо дуратайшуулай һанааень нэгэ бага тэгшэлбэ. Юундэб гэхэдэ, һүүлшын хэдэн мүрысөөнүүдтэ тэрэ муу дүн харуулһан байгаа. Иигээд саашаа ябаа һаань, Ородой суглуулагдамал командын һоригшод Инные орхёод, ондоо хүниие Олимпиадада абаашаха һэн гээд һанагдана.

Командна микст тоосоондо Ородой команда түрүүлжэ гараа. Буряадай тамиршад болохо Инна Степанова болон Эрдэм Цыдыпов гэгшэд онсо шалгараа. Тэдэ Бахрейн, Беларусь, Франци болон Хитад гүрэнүүдэй түлөөлэгшэдые илажа шадаа.

Эхэнэрнүүдэй дунда командна тоосоондо Ородой басагад шангай II һуури эзэлээ. Инна Степанова, Виктория Будаева болон Ростовой можын Елена Осипова гэгшэд ганса Беларусь Уласай тамиршадта шүүгдээ.

Хубиин тоосоондо Инна Степанова дахинаа шалгараа. Тэрэ III һуури эзэлжэ, хүрэл медальда хүртөө.

Ородой суглуулагдамал командын һоригшодой мэдээсэһэнэй ёһоор, тамиршад һайн дүн харуулжа, Олимпиадада яһала зүбөөр бэлдэжэ байһанаа гэршэлбэ. Командна тоосоондо Ородой тамиршад Хитадай шанга командатай жэгдэ адли гурба- гурбан медаль абаа.

Барилдаанай суглуулагдамал командын бүридэлдэ Мария Кузнецова оруулагдаа. Чуваш Уласһаа гарбалтай энэ тамиршан һүүлэй хэдэн жэлдэ Буряадай түлөө барилдана гээд һануулая. Тус мүрысөөндэ Мария шангай II һуури эзэлһэн байна. Финальна уулзалгада Хойто Солонгосой Хьон Гьон Мун гэгшэдэ шүүгдэшөө.

Боксын тулалдаануудта Буряадай тамиршан Батор Сагалуев оруулагдаа. Анха түрүүшынхиеэ 52 килограммай шэгнүүртэ хабаадажа байһан мэдээжэ тамиршан, хоёрдохи уулзалгадаа Хойто Солонгосой түлөөлэгшэдэ шүүгдэжэ, шангай һуури эзэлжэ шадаагүй.

Ород гүрэнөө түлөөлһэн бүхы тамиршад сэрэгэй прапорщигууд юм. Ородой суглуулагдамал команда бүхыдөө 161 медаль, тэрэ тоодо 51 алта абаһан байна. Мүн Хитадай тамиршад 239 медальда хүртөө.

Буряадтай хүршэ Монгол Уласай түлөөлэгшэд тус хэмжээ ябуулгада баһал амжалтатайгаар хабаадаа. Тэдэн 9 медальтай гэртээ бусаба. Монголой тамиршад сооһоо пистоледээр буудадаг Гундегма Отряд ори ганса алтан медаль абажа шадаа. Тиихэдэ боксоор, дзюдогоор, барилдаагаар монгол тамиршад шангай һууринуудые эзэлһэн байна.

Елена Осиповагай Инстаграмай зураг