​Хүрэл медальда хүртөө

Түргэн шатараар Ородой Кубогта хүртэхын түлөө финальна шатада Буряадай шатаршан Жамсаран Цыдыпов шангай гурбадахи һуури эзэлээ.

Жэлэй хугасаада түргэн шатараар 20 гаран шэлэн абалгын мүрысөөнүүд эмхидхэгдээ. Ивалгын дасанай дэргэдэ үнгэргэгдэдэг заншалта мүрысөөн тэдэнэй тоодо ороно гээд һануулая. Бүхы тулалдаануудай болоһоной удаа эгээл эрхим 16 шатаршан элирүүлэгдэжэ, финальна шатада хабаадаха эрхэдэ хүртөө.

“Топ-16” гэжэ нэрлэгдэһэн финальна шатада шатаршан бүхэн бэе бэетэеэ наадана. 15 шатын удаа мэдээжэ уласхоорондын гроссмейстер Александр Морозевич 12 очко абажа, түрүүлжэ гараа. 11 очкотой Александр Шиманов шангай хоёрдохи һуури эзэлээ. Оройдоол хахад очкогоор гээгдэһэн Жамсаран Цыдыпов хүрэл медальда хүртөө.

Тус мүрысөөндэ Жамсаран долоон хүниие шүүһэн байна. Мүн долоон уулзалгада тэнсээ. Ганса Володар Мурзинда шүүгдэшөө. Һонирхолтой гэхэдэ, Володар 5 очко абажа, аяар 12-дохи һуурида гараа. Тэрээндэ шүүгдээгүй һаа, Жамсаран хоёрдохи һуурида гараха байгаа.

2019 ондо Жамсаран Цыдыпов уласхоорондын гроссмейстер боложо шадаа һэн гээд һануулая.

ФШР-эй гэрэл зураг