​​Буряадай тамиршадай һур харбалгаар ээлжээтэ тулалтанууд

Эрэшүүлэй дунда түрүү һуури эзэлэгшэд 

Орёл хотодо Ород гүрэнэй ээлжээтэ чемпионадта Буряадай тамиршад 7 медаль абажа, командна тоосоондо түрүүлжэ гараа.

Классическа түхэлэй номо һуршаар харбалгада Буряадай тамиршад гурбан алтан медаль абаа. Хубиин тоосоондо Баир Цыбекдоржиев чемпионой нэрэ зэргэдэ хүртөө. Эхэнэрнүүдэй дунда Олимпиин наадануудта шангай һуури эзэлһэн Инна Степанова болон Ксения Перова гэгшэд һонирхолтой харбалга харуулаа. 5:5 гэһэн тоотойгоор уулзалгаяа түгэсхэхэдэнь, үшөө нэгэ-нэгэ нэмэлтэ годли табихыень дурадхагдаа. Эндэ хоюулаа 10 очконуудые тудаа. Тиигэжэ Иннын годли сагаалсын тэг дунда байхадань, чемпион боложо тодороо.

Светлана Гомбоева III һуури эзэлхын түлөө уулзалгада Үбэр Байгалай хизаарай Туяна Будожаповае 6:0 гэһэн тоотойгоор илаа.

Командна тоосоондо Буряадай эхэнэрнүүд алтан медаль абаа. Татьяна Бадмажапова, Инна Степанова болон Светлана Гомбоева гэгшэд харбаа.

Буряадай эрэшүүлэй суглуулагдамал команда II һуурида гараа. Цырен Балтаков, Баир Цыбекдоржиев болон Эрдэм Ирдынеев гэгшэд түрүү һуури эзэлхын түлөө уулзалгада Московско можын командада шүүгдээ.

Блочно номо һуршаар харбалгада Сергей Шенхоров хубиин тоосоондо II һуури эзэлээ. Хахад финалай уулзалгада Буряадай залуу тамиршан 2019 оной дэлхэйн чемпион Антон Булаевые шүүжэ гараа. Командна тоосоондо Буряадай эрэшүүл III һуури эзэлһэн байна. Дамби Ганжуров, Александр Калгин болон Сергей Шенхоров гэгшэд хүрэл медальнуудые абаа.

Эдэ үдэрнүүдтэ эдиршүүлэй дунда Ородой мүрысөөн үнгэргэгдэжэ байна. Буряадай спортдо дуратайшуул тамиршадһаа хэдэн медаль хүлеэнэ.

Мүнөөдэрһөө Буряадай түрүү тамиршад Олимпиин наадануудта бэлэдхэл эхилхэнь.

Е. Чебаковагай гэрэл зураг