​Зорюулга-дууниинь зондо хүрөө

Үндэр хэмжээндэ үнгэргэгдэһэн һээр шаалгаар “Алтан Мундарга” мүрысөөнэй үедэ тамиршадта зорюулагдаһан шэнэ дуун зэдэлһэн байна. Даниил Нохоровой үгэдэ Вера Шобосоева хүгжэм зохёогоо. 

Дархан угтай Даниил Нохоров Захаамин аймагай Санага һууринда түрэһэн намтартай. Уран гартан олон жэлдэ түрэл совхоздоо ажал хээ. Хажуугаарнь шүлэгүүдые зохёодог байгаа. 2003 онһоо хойшо хирэ-хирэ болоод лэ, бүтээлнүүдтэйнь “Ажалай туг” сониной уншагшад танилсадаг гээшэ. 

Һээр шаалгаар түрүүшын алхамуудай Буряад Уласта хэгдэжэ байхада, Нохоровтоной гэр бүлэ өөһэдынгөө хубита хүгжэлтэдэнь оруулаа. Даниил Дашиевичай дүү хүбүүн Бэликто Нохоров 2014 оной Сурхарбаан нааданай түрүүшын абарга болоһон байна. Мүн өөрөөшье Даниил Нохоров олон тоото мүрысөөнүүдтэ түрүү һууринуудые эзэлһэн намтартай. 

Нохоровтоной гэр бүлэ һээр шаалгаар мүрысөөнүүдтэ өөрын шангуудые бэлдэжэ, бэлэг болгон барюулдаг заншалтай. 

Тайзан дээрэ гаража, һээр хухалдаг хүбүүдтэ зорюулжа, нэгэ һайхан шүлэг зохёожорхёо бэлэй. “Ажалай тугта” тэрэнь 2015 оной эхиндэ хэблэгдээ һэн. 

Харин мүнөө жэлэй мүрысөөнэй урдахана “Алтан Мундарга” шүлэг дуун болгогдоо. Мэдээжэ дуушан Вера Шобосоева хүгжэм зохёоһон байна. 

Вера хадаа “Алтан Мундарга” үнгэргэлгэдэ өөрын ехэ хубита оруулаа. Һайндэрэй нээлгын ба хаалгын баяр ёһололой ябаса зохёожо, туһа нэмэри оруулаа. Мүн тиихэдэ дууша, хүгжэмшэ нүхэдөө эндэ урижа, сугларагшадые баярлуулаа. “Һэершэ хүбүүдтэ” гэһэн дуун олондо хадуугдаа. Энээнһээ удаа тэрэ холо ойгуур зэдэлхэ гээд найдагдана. 

«Һэершэ хүбүүдтэ» 

Үгэнь Даниил Нохоровой, хүгжэмынь Вера Шобосоевагай 

Һарьдаг уулын ногооной

Һормоор бэеэ заhаhан,

Һарлаг сэсэн малай

Һэерынь дээрэ үргэhэн

Холын малшан угтай

Хадаhаа бууhан хүбүүд,

Бурхан ехэ hахюултай

Буряад дайдын бүргэдүүд.

Уулын тунгалаг булагhаа

Ундалжа бэеэ олоhон,

Үхэр малайнгаа hэерые

Үндэр дээрэ үргэhэн

Холын малшан угтай

Хадаhаа бууhан хүбүүд,

Бурхан ехэ hахюултай

Буряад дайдын бүргэдүүд.

Энгэр газар хүльбэржэ,

Эхынгээ сүүгээр тэнжэhэн,

Эбэртэ малайнгаа hэерые

Эгүүридэ хүргэжэ шадаhан

Холын малшан угтай

Хадаhаа бууhан хүбүүд,

Бурхан ехэ hахюултай

Буряад дайдын бүргэдүүд.

Угаа саашань үргэжэ,

Үри хүүгэдтээ дамжуулhан,

Буян хэшэгээ дэлгэжэ,

Баян гараар далгалhан

Холын малшан угтай

Хадаhаа бууhан хүбүүд,

Бурхан ехэ hахюултай

Буряад дайдын бүргэдүүд.

Борис Балдановай гэрэл зураг