Түбэдэй дууша аяганууд

Мүнөө Баруун Европын, Америкын болон дэлхэйн бусад булангуудай ямаршье яhанай, шажанай зоной ордон байшан­гуудаар, эрдэмтэдэй лабораторинуудаар, үндэр хүгжэлтын ухаатай приборнуудаар дүүрэн офи­суудаар түбэдэй дууша аяганууд хүндэтэй hуури эзэлдэг болоhон.

Хэдэн мянгаад жэлэй саада тээ Саhата ороной орьёлнуудай дунда бии болоhон дууша аягануу­дай абяаниинь флуоресцентнэ гэдэг зайн галай лампочкануудай, элдэбын видео-хэрэгсэлнүүдэй, компьютернуудай, гар утаһануудай болон цивилизациин бусад хэрэгсэлнүүдэй хорото муу элшэнүүдые hалган дэгдээхэ аргатай гэжэ элирүүлэгдээ.

Yндэр болбосоролой классическа хүгжэм хүнэй бэедэ hайн нүлөө үзүүлдэг, элдэб муу үбшэнгүүдые эдэгээдэг гэжэ үни урдын сагhаа мэдээжэ. Харин түбэдэй дууша аяганууд дэлхэй дээрэ эли бүхы хүгжэмэй зэмсэгүүдhээ hураггүй хүсэтэйгөөр хүнэй бэеын аура шангадхадаг, хамаг үбшэнгүүдые сарадаг гэжэ эрдэмтэдэй прибор­нууд гэршэлhэн байна. Компьютерай саана удаан хүдэлөөд эсэhэн хүнэй толгойе гансата hонор болгоод, бэедэнь хүсэ шадал нэмээдэг гайхамшаг­та аяганууд.

Нангин дууша аягануудые гэрэйнгээ таhалгануудай дүрбэн углуунуудта үе-үе зэдэлүүлжэ байбал, байра дотор сугларhан хамаг муу элшэнүүд дэгдэжэ, «Ци» гэhэн буян хэшэгэй энерги татагдадаг гэжэ хитадай фэншуй hургаал заана.

НАНГИН АЯЛГААР ЭМНЭЛГЭ

Бэеэ hула табижа хэбтээд, бисалгалай амар­лингы тэнюун байдалда дууша аягануудые шагнахада, hанаа сэдьхэл тэгшэржэ, бэе махабад арюудхагдадаг, элүүржэдэг. Хүндэ үбшэнhөө эдэгэхэдэ, гай гашуудалтай байдалhаа гарахада, дууша аяганууд эрхимээр туhалха аргатай. Ажа­лай hүүлээр үдэшэндөө «абяанай ванна» абажа, 15 минутаhаа (тон богонинь) 1 час (тон удааниинь) хүрэтэр дууша аягануудые шагнабал, хүн түргэн шадал тэнхээ ородог, уур сухалынь таража, hанаа бодолынь сагаардаг.

Түбэдэй дууша аягануудые бэеын элдэб орга­нуудай, элшэтэ чакрануудай байрын хажуугаар, али гэбэл, бэеын хажуу талада табяад, наадажа шагнадаг гуримтай. Али гэбэл, хэбтээд, хүйhэнhөө хоёр-гурбан хурга дээшэ «наранай хүрмэлдөөн» гэhэн гурбадахи чакрын hуурида табяад аялга­туулхада, ехэ hайн. Тиихэдэ эди шэдитэ абяанай ёhотой массаж хэгдэжэ, бэе махабадай клеткэ бүхэн энхэ элүүрэй элшээр халижа hэргэдэг.

Дууша аяганууд толгойн үбшэнтэй, депрессидэ орожо, юумэнhээ айдаг үбшэнтэй, элдэб фобинууд- тай, ехээр hуларhан, шадал тэнхээгүй бэетэй, муу нойртой, гиперактивна үхибүүдтэ г.м. нервын, ухаан бодолой шалтагтай үбшэнгүүдые түргөөр ба эрхимээр сарадаг гэжэ мэдээжэ. Түбэдтэ хээли­тэй эхэнэрнүүд дууша аягануудhаа хоол баридаг, юундэб гэхэдэ, нангин аяга соо табигдаhан эдеэн арюудхагдажа, ерээдүйн эжые үхибүүнтэйнь хам­та хамаг бузар буртагhаа аршалдаг.

Түбэдэй дууша аягые наймааhаа худалдажа абаад, гэртээ өөhэдөө аялгатуулжа байхада болохо. Мүн лэ элдэб янзын компакт-дискнүүдтэ бэшэгдэhэн, интернедээр дамжуулагдаhан дууша аягануудай абяа мүн лэ дутуугүй hайн нүлөө үзүүлдэг.

Наймаада дурадхагдадаг түбэдэй дууша аяга­нууд сооhоо хуурмаг бэшэ, hайн шанарай аягые зүбөөр шэлэжэ абахын тулада, абяаень шагнаха хэрэгтэй. Yнэн бодото аягын абяаниинь эрид эгсээр гансата замхадаггүй, харин аалин жэгдээр аялгатан татаhаар, агаарта тунадаг.

Дууша аяганууд заабол 7 зүйлhээ бүридэдэг: алтан, мүнгэн, түмэр, зэд, хара туулган, сагаан туулган ба мүнгэнэй уhан. Урдын хуушанай аяга­нуудай бүридэлдэ тэнгэриин шулуунай (метеори­дай) түмэр ородог гэжэ шэнжэлэгдэhэн.

ЗОЛ ЖАРГАЛАЙ ДОЛГИНДО

Наймаада үшөө болор шулуугаар бүтээгдэhэн дууша аяганууд дурадхагдадаг. Түмэр аяганууд үнгэрhэн сагаар аялгатажа, хүнэй түрэлтэнэй эрдэм ухаа, хүсэ шадал ба аршалалта хамгаалга уряалдаг. Харин болор аягануудай долгинууд хүнэй ерээдүйн хуби заяанай буян хэшэг, зол жар­гал hэргээхэ шэдитэй гэжэ тэмдэглэгдэнэ. Түмэр аяга – бүhэтэй хүнүүдтэ, болор аяга – эхэнэрнүүдтэ ба залуу үетэндэ таарадаг гэhэн удхатай.

Тиимэhээ гэр бүлэдөө хоёр янзын дууша аяга­нуудтай байбал, hайн ха. Түмэрөөрнь наадажа, уг гарбалтаяа холбоотой, аршалалтатай байха, харин болор аягын дуугаар ерээдүйгөө арюудхаха.

Эрдэмтэдэй элирүүлhээр, түбэдэй дууша аяга­нууд 432Гц хүсэтэй эм домто сохидолой абяатай. Тэрэнь юртэмсын гармони гэдэг зол жаргалай, энхэ элүүрэй, амгалан тайбанай долгинууд. Эгээл гайхалтайнь гэхэдэ, Грециин, Римэй г.м. урдын агуу- ехэ гүрэнүүдэй хүгжэмэй зэмсэгүүд мүн лэ 432Гц сохидолой долгиндо зэдэлдэг байhан гэжэ тэмдэг- лэгдэнэ. Платон, Гиппократ, Аристотель, Пифагор мэтын суута эрдэмтэд элдэб хүндэ үбшэнгүүдые 432Гц сохидолтой хүгжэмөөр аргалдаг байhан ха.