Түүхэтэ Олимпиада

Хурдан санашаднай

Ород гүрэнэй санашад хэзээ хэзээнэйхиһээ амжалтатайгаар мүрысэжэ байна гэхэдэ, алдуу болохогүй. Эстафетнэ урилдаанда тэдэнтэй тэмсэхэ команданууд олдобогүй. Советскэ Союзай, Ород гүрэнэй эрэшүүл аяар 42 жэлэй хугасаада алтан медаль абаагүй байгаа бшуу. Үшөө холын 1980 ондо США-гай Лейк-Плэсид хотодо түрүү һуури эзэлэгдээ. Тиихэдэ илалта асарһан Василий Рочев, Николай Бажуков, Евгений Беляев ба Николай Зимя[1]тов гэгшэдые даб гээд мэргэжэлтэд абаһаар лэ нэрлэжэ шадахагүйл. Энэ удаа Алексей Червоткин, Александр Большунов, Денис Спицов болон Сергей Устюгов гэгшэд бэе бэедээ эстафетэ дамжуулжа, бусадһаа 1 минутаһаа үлүүтэйгээр түрүүлжэ гараа. Шангай һуури эзэлһэн Норвеги болон Франци гүрэнүүдэй тамиршад яагаадшье шүүжэ шадахагүй байшоо. Эхэнэрнүүдэй команданууд 2006 онһоо хойшо оройдоол нэгэ дахин шангай һуурида гараа бэлэй. Наталья Баранова, Юлия Чепалова, Лариса Куклина, Евгения Медведева гэгшэд Туринда алтан медаль абаад, нэрэнүүдээ спортын түүхэдэ алтан үзэгөөр бэшүүлһэн юм. 2018 ондо Ородой суглуулагдамал команда шангай 3-дахи һуури эзэлээ. Тус амжалтые удаадахи Олимпиин наадануудта басагаднай бүри дээшэнь үргэбэ. Юлия Ступак, Наталья Непряева, Татьяна Сорина, Вероника Степанова гэгшэд Олимпиин абаргануудай нэрэ зэргэдэ хүртэбэ гээшэ.

 Хоб-жэб һүжэрһөөр

Юундэб даа, Ород гүрэнэй тамиршадай шангай һууринуудые эзэлхэдэнь, допинг тухай заал һаа зугаа гараадхина. “Ганса бэеэ шангадхаха эм дом уужа шалгарна гүт?” - гэхэ мэтэ хүнэй ухаанда ороогүй асуудалнуудые хари гүрэнэй сурбалжалагшад табина. Гэхэтэй хамта, Норвегиин ехэнхи тамиршад астма үбшэндэ ехээр нэрбэгдэнхэй, тиимэһээ шанга эм ууха ёһотой гэһэн саарһа данса абаад ябана. Хитадай эмхидхэгшэд олон юумэндэнь этигэнгүй, эм домтой ашааень гүрэндөө оруулаагүй. Елүүр дээрэ конькигаар фигурна һолжоролгоор командна тоосоондо Ородой тамиршадай 1-дэхи һуури эзэлһые булта һайнаар һанана ёһотойт. Хара хүлһэеэ адхажа олоһон алтан медальнуудыень мүнөөшье болотор зүүлгэгдээгүй бшуу. Эгээл залуу тамиршан Камила Валиевае допинг хэрэглээ гэһэн һураг гаранхай.

Һонирхолтой мэдээнүүд

Сноубордоор “борд-кросс” гэһэн шэглэлдэ США-гай Линдсей Джейкобеллис хоёр алтан медальда хүртэбэ. Үшөө 2006 ондо тэрэ түрүүшынгээ Олимпиадада хабаадаһан байна. Тиихэдэ Линдсей бэеэ харуулхаяа гү, али досоонь залуу шуһанай дэлбэржэ байһанһаа гү, урилдаанай түгэсхэлдэ бусадһаа үлүү урда түрүүлжэ ябаһан аад, һүрөөд, санаяа гараараа эльбэхэмни гээд, унашоо бэлэй. Хэды тиигэбэшье, тэрэ мүнгэн медаль абаа һэн. Мүнөө Америкын тамиршан тиимэ үлүү юумэ харуулхаяа болинхой.

 * * *

 Германиин конькигаар урилдадаг Клаудия Пехштайн 8-дахияа Олимпиин наадануудта хабаадана. Клаудия мүнөө 49 наһатай юм. Эгээл залуу тамиршан хадаа 15 наһатай Камила Валиева болоно.

* * *

 Бээжэндэ мүрысэхэеэ 91 гүрэнэй түлөөлэгшэд ерэнхэй. Гаити, Саудовска Арави гүрэнүүдэй түлөөлэгшэд анха түрүүшынхиеэ үбэлэй наадануудта хабаадажа байна. Тэдэ хадаһаа санаар һолжоролгодо оролсонхой