​СССР гүрэнэй байдалһаа

Шүүмжэлэл

Суглаа хуралай дүүрэхэдэ, ойлгосо муутай Ойдоб аляа хүйхэр Арданһаа асууба:

- Дээрэһээ шүүмжэлэл, али дороһоо шүүмжэлэл гэжэ юун бэ? Бүхы суглаан – эдэ хоёр шүүмжэлэл тухай хэлэгдээ, юушье ойлгоогүйб. Арданиинь:

- Хэлээ һаамни ойлгохогүйш, эли тодоор харуулаад үгэһүү. Ойдобоо доро үлөөжэ, өөрөө балкон дээрэ гараба. Һүүлээрнь дээрэһээ нёлбожорхиходонь, доро байһан “ойлгосо муутайн” сэхэ толгой дээрэнь тудаба:

- Энэшни дээрэһээ шүүмжэлэл гэжэ нэрэтэй. Харин мүнөө ши нам руу нёлбо! Ойлгосо муутай Ойдобой гэмгүй нёлбоһо аман соогоо суглуулжа, дээшэнь нёлбон гэһээнь, өөрынь толгой дээрэ онон тудабал даа...

Аляа хүйхэр Ардан:

- Харин энэшни дороһоо шүүмжэлэл!

* * *

Эдеэ хоолой үйлэдбэриин зүблөөн боложо байна...

Колбаса үйлэдбэрилдэг түрүү заводой даргые үйлэдбэриингөө ажалай арга нюусануудтай хубаалдахыень дурадхаба. Тэрэ ендэртэ гараба...

- Бидэндэ ямаршье арга нюуса үгыл! Арһа-шүрбэһэ, гэдэһэ–гүзээ, уушха-дотор, тархи-тагалсаг гэхэ мэтын элдэбын юумэ хээд, нэгэ заа хэршэһэн мяха нэмэһэн болоод, холёод худхаад, колбаса болонол...

Тэрэ дары колбаса үйлэдбэрилдэг 5-6 заводой дарганар һуга харайн, һүрэн бодожо хашхаралдаба:

- Аа!!! Ши үшөө хэршэмэл мяха нэмэнэгши?!

* * *

Наһанһаа нүгшэжэ байһан хотын захиргаанай даргын оронойнь дэргэдэ хамта ажаллаһан нэрэтэй солотой эрхэтэд сугларжа, аалихан хоорондоо шэбэнэлдэн дуугаралсана:

- Юрэ бусын, гайхалтай һайн хүн байгаал даа!

- Ямар сэсэн, мэргэн хүн бэлэй!

- Харин ямар үнэн сэхэ байгааб!

- Амгалан, һайн сэдьхэлтэй... Наһа баража байһан дарга секунда зуура нюдэеэ нээжэ, аман соогоо гүбэрбэ:

- Гуйнаб таниие, даруу номгон зангыемни бү мартагты...

* * *

Нэгэ номой киоскын олзо мүнгэнэйнь оролго багахан болоходо, наймаашань ехэ саагуур үүсхэл гаргажа, зарим номуудайнгаа гадар таладань янза бүриин фото-зурагуудые няаба. Тэрэнэй һүүлээр олзо мүнгэнэй оролго айхабтар ехэ боложо, наймаашанай урма сэдьхэлынь өөдөө бодобо... Зургаан хоногой хугасаа соо зали забдагүй ажал ябана, олзо ороно. Гэнтэ гүрэнэй аюулгүй байдалые сахигшад орожо:

- Та баригдаат!

- Юунэй түлөө, юун болооб?

Харюудань:

- “Эшэхэ нюургүй хүн” гэжэ номой гадарта гүрэнэй толгойлогшын гэрэл-зураг няахадатнай, бидэ бэеэ баряабди… «Тэжээбэриин хүнүүд” – “Нахлебники” гэжэ номой гадарта гүрэнэй толгойлогшын гэр бүлын гэрэл-зураг няахадатнай, баһа тэсэбэриеэ баряабди... Харин манай гүрэнэй толгойлогшын бүхы засагайнгаа гэшүүдтэй ороһон гэрэл-зураг «Али-Баба ба 40 дээрмэшэд» номой гадарта няахадатнай, тэсэбэримнай һалаа...

Очир Нурбаев