​Апрелиин 1 - Энеэдэнэй үдэр

СССР гүрэнэй байдалһаа

Баруунай гүрэнүүдэй бизнесэй түлөөлэгшэдэй Росси гүрэнэй Президенттэй уулзалгын үе...

- Борис Николаевич, мүнөө дээрээ танай орондо хүшэр хүндэ байдал тогтоод байна. Бидэнэй зүгһөө ямар туһаламжа хэрэгтэй бэ? Жэшээнь, СПИД үбшэнтэй тэмсэхэ...

- Туһаламжа хэрэггүй! – гэнэ Ельцин. СПИД гээшэтнай 20-дохи зуун жэлэй тахал үбшэн. Росси ба Япон гүрэнүүдтэ аймшагтай бэшэ...

- Юундэ? – гэжэ олзын хэрэг эрхилэгшэд һонирхобо.

- Япон гүрэн 21-дэхи зуун жэлэй ажамидаралаар ажаһууна.

- Росси? - Харин Росси - 19-дэхи...

Зохёол хэблэлдэ гараагүй

37 жэлэй хугасаа соо отель-буудалда алба хэһэн Эржэн эхэнэрэй наһанайнгаа амаралтада гарахань дүтэлбэ. Нэгэтэ дүтынгөө танилнуудай дунда үгэ алдаба:

- 30 гаран жэлдэ энэ буудал соо хүнэй хараа үзөөгүй олон һонирхолтой ушарнуудые харааб... Дурасхаал болгон, нэгэ зохёол-мемуар бэшэхэ гэжэ зорилго табяад байнаб...

Нэгэ хэды үдэрэй үнгэрөөд байхада, Эржэн нюуса бэшэг абаба, тэрээн соонь иимэ мэдээсэл байба: “Нэрэтэй солотой депутадуудай зүгһөө энэ номоо бү бэшыт даа гэжэ гуйнабди, али гэбэл, бидэнэй нэрэнүүдые дурдангүй үлөөгыт. Зохёол-номойтнай шагнал-гонорарайтнай мүнгэн түлбэри эльгээнэбди. Бага гээ һаатнай, үшөө нэмэхэбди...”

Хон-жэн абяагүйхэн... Зохёол хэблэлдэ гараагүй хаш...

Очир Нурбаев